Քարվաճառում երեկ տեղադրված դարպասներն այսօր կոտրվել են․ Թագուհի Թովմասյան

Քիչ առաջ ահազանգ ստացա, որ երեկ Քարվաճառում տեղադրված դարպասն այսօր կոտրվել է, ու հակառակորդն առաջ է գալիս։ Դարպասները ուրիշ տեղ պետք է դրվեն։ Ես չեմ հասկանում, թե Եռակողմ հայտարարության երրորդ կամ երկրորդ կողմը ո՞ւր է։ Ես, որպես Գեղարքունիքի մարզից ընտրված պատգամավոր, խնդրում եմ պաշտպանել վարդենիսցիների իրավունքները։

Այս մասին ԱԺ նիստի ժամանակ ասաց «Իմ քայլը» դաշինքը լքած, բայց մանդատը պահպանած պատգամավոր Թագուհի Թովմասյանը։

Տեղեկատվություն կա նաև այն մասին, որ ադրբեջանցիները մտել են Սոթքի ոսկու հանք։ Լուրը դեռ Թովմասյանի հետ զրույցում չեն հաստատել, սակայն, իրական վտանգ կա։

Թովմասյանը ահազանգեր է ստանում, որ կան զինվորներ, որոնք սեպտեմբերի 25-ից մինչև հիմա անգամ լոգանք չեն ընդունել։ Նրա խոսքով՝ հերթափոխ ընդհանրապես չի իրականացվում։ Զինծառայողները չեն կարող իջնել դիրքերից։

«Ե՞րբ պետք է դուրս գանք թմբիրից, աշխատանք կա անելու։ Իսկ գերիների ու անհետ կորածների թվի մասին որևէ մեկը կարո՞ղ է գոնե մոտավոր թիվ հրապարակել, կարո՞ղ է որևէ մեկը հստակ ժամկետ նշել, թե երբ կկարգավորվի այս հարցը»,- ասաց Թովմասյանը՝ հրավիրելով Ոստիկանության, ԱԱԾ-ի, ԱԻՆ-ի ուշադրությունը բարձրացված հարցերով։  

Աղբյուր՝ Armenia today