Թուրքերը Նիկոլ Փաշինյանի ձեռքերով պղծեցին Մոնթե Մելքոնյանի հիշատակն ու կերպարը

Պետականությունը եւ խորհրդանիշները միշտ քայլում են կողք կողքի: Նման խորհրդանիշներից մեկը, որի շուրջ կառուցվել է Հայկական Պետականությունը, մայիսի 9-ն էր: Եռատոնի օր մեր ժողովրդի համար: Հայրենական մեծ պատերազմում` Հաղթանակի օր, Արցախի Պաշտպանության բանակի ստեղծման օր և Շուշիի ազատագրման օր: Հայոց Պետականության մեկ այլ խորհրդանիշը Մոնթե Մելքոնյանի կերպարն է: Մարդու, ով իր կյանքը դրեց Հայրենիքի ազատագրման համար: Մարդու, ով ազատագրեց ոչ միայն Մարտունու շրջանը, այլեւ Քարվաճառը:

Հասկանալի է նաև, որ այն, ինչ մեզ համար տոն է և խորհրդանիշ, թիրախ է Ադրբեջանի և Թուրքիայի համար: Ոչնչացման ենթեկա թիրախ:

Տասնամյակներ շարունակ ադրբեջանա-թուրքական տանդեմը փորձում էր ոչնչացնել ոչ միայն մեր պետականությունը, այլև ոչնչացնել մեր խորհրդանիշները: Հոկտեմբերի 27-ին տեղի ունեցած ահաբեկչությունը, որի ժամանակ սպանվեց Վազգեն Սարգսյանը, 2008-ի մարտի 1-ի դեպքերը, 2016-ի ապրիլյան պատերազմը՝ սրանք մեր հպարտությունն ու պետականությունն իր խորհրդանիշներով խլելու փորձերի մի մասն է:

Այնուամենայնիվ, եթե դրսից եկող ճնշումը չկարողացավ ոչնչացնել Հայոց Պետականությունը և դրա խորհրդանիշները, ապա «մասնաբաժին ստանալով» 2018-ի հայկական հեղափոխության մեջ թուրքական 5-րդ շարասյունը հաղթական երթով անցավ մեր երկրի տարածքով և անցած 2,5 տարվա ընթացքում նպատակաուղղված կերպով ոչնչացրեց մեր պետական խորհրդանիշները:

2.5 տարվա ընթացքում արվել է այն, ինչ նախորդ տարիներին ադրբեջանա-թուրքական տանդեմը չի կարողացել անել: Խարխլվել է բանակի և ռազմական գեներալների հեղինակությունը, 2008-ին իշխանության բռնի տապալելու փորձը հայտարարվել է «ժողովրդի կամքի դրսևորում և ապստամբության իրավունքի դրսեւորում», Ղարաբաղյան պատերազմի հերոսներին դատել են Շուշիի ազատագրման օրը, պետությունն իրականացրեց հասարակությունը հայերի ու ղարաբաղցիների բաժանման կեղտոտ քարոզը:

Բացարձակապես այն ամենը, ինչ Բաքուն և Անկարան պլանավորել և փորձել են իրականացնել գրեթե 30 տարի, Փաշինյանն ու իր թիմը իրականացրեցին 2,5 տարում:

Բայց Փաշինյանին չի բավարարել այս ամենը և երբ Շուշին արդեն 2-3 օր գտնվում էր Ադրբեջանի ձեռքում, նա միայն Ադրբեջանի դրոշի օրը կապիտուլյացիայի ակտ ստորագրեց (խորհրդանշական է, չէ՞), ինչպես նաև համաձայնեց Քարվաճառից զորքերը դուրս բերել նոյեմբերի 25-ին՝ Մոնթե Մելքոնյանի ծննդյան օրը (խորհրդանշական է, չէ՞):

Այսպիսով, Նիկոլն ավարտեց Մոնթե Մելքոնյանի կերպարն ու հիշողությունը պղծելու գործընթացը՝ 2018-ին իշխանության գալով Մոնթեի հագուստով և վիրակապը ձեռքին, իսկ հիմա, ամսի 25-ին Նիկոլը թաղեց Մոնթե Մելքոնյանի կյանքի գործը իր իսկ ծննդյան օրը:

Պատմությունը կտա կատարվածի գնահատականը, բայց մենք միայն պետք է փաստենք, որ վերջին 2,5 տարվա ընթացքում Փաշինյանի և նրա թիմի գործունեությունը համապատասխանում էր միայն Թուրքիայի և Ադրբեջանի շահերին: Եվ փաստորեն, երբ Նիկոլն ասաց, որ «Ղարաբաղյան հակամարտության կարգավորումը պետք է բավարարի Հայաստանի, Ղարաբաղի և Ադրբեջանի ժողովուրդներին», նա իրականում աշխատում էր միայն Ադրբեջանի, Թուրքիայի և սիրիացի ահաբեկիչների շահերի բավարարման համար: Ահաբեկիչների որոնց ընտանիքներն արդեն տեղափոխվում են այն տարածքները, որոնք Նիկոլը տվել է Ադրբեջանին:

Սևակ Դանիելյան