Պարո՛ն Տեր-Պետրոսյան, աշակերտիդ կանչի՛ր մոտդ, բացատրիր, որ ազգը կործանման տանել չի կարելի. Իսրայել Հակոբկոխյան. Տեսանյութ

«Դեռևս 1990 թվականին ես ասել եմ, որ իշխանության են եկել հավայի հաչող շները, իսկ 30 տարի հետո եկավ հավայի հաչող շների շարունակողը: Բայց մինչև իմ խոսքերի ապացուցելը, ուզում եմ դիմել մեր այսօրվա ոստիկաններին, մեկ էլ նինձայի շորերով տղերքին. եթե այսօր չէ, վաղը կամ մյուս օրը իմանալու են, ովքեր եք ու ով է ձեզ հրամայել, որ գաք, հայ ազգի դեմ այսպիսի դավադիր բաներ անեք: Այս ամենում առաջինը մեղադրում եմ մեր Երրորդ նախագահին, որ ինքը Նիկոլի հագով կոստյում կարեց: Սահմանադրություն գրողին էլ եմ մեղադրում, որ սարքեցին խորհրդարանական երկիր, հետո էլ այնպես արեցին, որ Նիկոլի նմանին բերեն իշխանության ու մեր երկիրը ծախեն,- ասուլիսի ժամանակ ասաց բռնցքամարտի աշխարհի չեմպիոն, Եվրոպայի եռակի, ԽՍՀՄ սպորտի վաստակավոր վարպետ Իսրայել Հակոբկոխյանը՝ հավելելով,- Ամեն դեպքում, եթե նրանց մեջ ոստիկաններ մնացել են, ես ուզում եմ զգուշացնել. միևնույն է՝ վաղը դիմակով կլինեք, ինչով կլինեք, ձեր մեջ դեռ երկիրը սիրող մարդիկ են մնացել, ովքեր հատ-հատ բոլորիդ անունները տալու են, ու դրանից հետո տեսնեմ, թե դուք ոնց եք ապրելու Հայաստանում: Ալիևը ոնց որ Նիկոլին հատուկ տեղ է պատրաստել Ադրբեջանում: Սրանք չեն ուզում հասկանալ, որ աշխարհի որ ծայրում էլ լինեն՝ իրենց գտնելու են: Միակ տեղը, որ կարող են մի փոքր իրենց գոյությունը պաշտպանել՝ Ադրբեջանն է լինելու: Ես իմ ակցիաները դադարեցրել եմ, քանի որ մեռնողին բան չի լինում, ինչ լինում է՝ ապրողին է լինում: Բառեր չեմ գտնում, ո՞նց է կարողանում Նիկոլը քնել, որ Հայրենիքի համար կյանք տված այդքան երեխայի գլուխ կերավ ու դեռ հանգիստ նստած, կառչած է այդ աթոռից ու չի ուզում հեռանալ:

Թող Նիկոլը չմտածի, որ Սադամ Հուսեյնից էլ է ուժեղ տղա, Քադաֆիից էլ, թող իմանա, որ վաղը կարող  է այդ նույն բանը իրեն սպասի, բայց դա չեմ ցանկանում։ Ուզում եմ, որ 100 տարի ապրի ու Ադրբեջանում իր տեղը գտնի: Նիկոլ, քեզ մի բան եմ խնդրում, եթե քո մեջ գոնե մի քիչ մարդկություն մնացել է, հրաժարվի՛ր այդ աթոռից, տեսնենք, ով է պատրաստ հանձն առնի, որ գնա Պուտինի հետ նստի, տղամարդու պես բանակցի: Ոնց նայում եմ՝ Պուտինը միայն մեկ մարդու հետ հարգանքով կնստի և կխոսի: Այն մարդու հետ, ում ցանկություն ուներ գալ  նույնիսկ գաղութում տեսակցության: Միակ մարդը, ով կարող է նստել, Պուտինի հետ խոսել, որ այս ազգի համար մի բան անեն՝ Ռոբերտ Քոչարյանն է»:

Հարցին՝ 10 տարի Ռ. Քոչարյանի հեղինակության դեմ են աշխատել, հանրությունը պատրա՞ստ է գնալ, բերել նրան, բռնցքամարտիկը պատասխանեց.

«Հանրությունը պարտավոր է, որովհետև ես փաստերով եմ ասում. միակ մարդուն, որ Պուտինը շնորհավորում է, ու նա էլ նախագահ չէ՝ Ռ. Քոչարյանն է: ՀՅԴ-ին, ԲՀԿ-ին ու մնացած կուսակցություններին եմ ասում, այսօր միայն տղավարի, ընկերը ընկերոջ հետ կարող է նստել ու խոսել Ռոբերտ Քոչարյանը: Չնայած, ասեմ իմանաք՝ իր նախագահության ժամանակ ամենաչգնահատված մարզիկը ես եմ եղել, որովհետև ամեն Ամանորի որ հավաքվում էին՝ ինձ չէին էլ հրավիրում,  բայց, անկախ ամեն ինչից՝ մարդկանց ընդունում եմ իրենց արած գործերով: Այն մարդը, ով ժամանակին հայրենիք է ազատագրել, կարող է Պուտինի հետ նստել, ընկերը ընկերոջ հետ խոսել, դա Ռոբերտ Քոչարյանն է»:

Իսրայել Հակոբկոխյանն ասաց՝ ցույցերով հարցեր չեն կարող լուծել. «Խնդրանքս՝ 17 կուսակցություններին. այստեղ մեկ ելք կա. կազմակերպենք այլընտրանքային կառավարություն, ստորագրահավաք անեն: Թող իրենք լինեն ղեկավար՝ ես խնդիր չեմ տեսնում. կլինի դաշնակը, կլինի հնչակը, կլինի ՀԱԿ-ը, ով ուզում է՝ լինի: Թող հավաքվեն իրար գլխի՝ այլընտրանքային կառավարություն ստեղծեն: ժողովրդի 90 տոկոսը կգա, կստորագրի, որ մենք համաձայն ենք այլընտրանքային կառավարության ստեղծմանը: Չեմ կարծում, որ հայ ազգով մտահոգված ՀՀ ժողովուրդը չի ենթարկվի այդ ժամանակավոր կառավարությանը, մինչև որ ընտրություններ կնշանակվեն: Այդ ժամանակավոր կառավարությունը թող գա, խնդրի Ռոբերտ Քոչարյանին, որ նա լինի բանակցող, գնա, Պուտինի հետ նստի, որոշեն, թե ոնց անենք, որ ամբողջ Հայաստանը չկորցնենք, որովհետև անհայրենիք մարդը ոչ մի բանի պետք չէ:

Գիտեք, ես չեմ պատկերացնում.․. վաղը-մյուս օրը մեր մարզիկները մրցումների գնան՝ ոնց ենք կարողանալու նայել ադրբեջանցիների երեսին: Նիկոլ, տես քեզ ինչ եմ ասում, դու, եթե գոնե մեր մասին չմտածես, քո երեխաների մասին մտածո՞ւմ ես, որ վաղը երեսով չտան, որ դավաճանի երեխաներ են: Խնդրանքս է՝ դու հանգիստ թող, հեռացիր, մեր մեջ էլ քաղաքացիական կռիվ մի սարքիր, թող տեսնենք՝ ինչ ենք բերում մեր ազգի գլխին, որովհետև դու այսօր եկել ես ոչ միայն հող հանձնելու, այլև եկել ես, որ հայը հային դեմ հանես: Ուզում եմ խնդրանքով դիմել Լևոն Տեր-Պետրոսյանին. պարո՛ն Տեր-Պետրոսյան, աշակերտիդ կանչի՛ր մոտդ, բացատրիր, որ ազգը կործանման տանել չի կարելի, որովհետև այսօր միակ արհավիրքը, որ կարող ես բերել մեր ազգի գլխին, Նիկոլ Փաշինյա՛ն, դու ես: Ստից ձևեր որ թափում ես, իբր քեզ չի լսում, քո աշակերտը չի կարող քեզ չլսել, որովհետև ինքը քո ամենախելացի, լավ, ճարպիկ աշակերտն է եղել: Սևակի ասած խոսքերով՝ անվերջ սողալով առաջ է եկել, եկել է այդպես և տարեցտարի ելել է այդպես շալակն աշխարհի: Ուրեմն, դու կարող է՝ մեր շալակն ես ելել, բայց աշխարհի շալակը չես կարող ելնել, որովհետև քո նման ավանտյուրիստները, քծնողները ուրիշ տեղ չեն ընդունվելու: Եթե քո երեխաների մասին մի փոքր մտածում ես՝ այս աթոռը թող, որ հանգիստ տեսնենք, թե ոնց ենք մեր ազգին փրկում»: