Տեղի է ունեցել «Լազարեւյան ակումբի» խորհրդի նիստը
Նոյեմբերի քսանին, Մոսկվայի ԱՊՀ երկրների ինստիտուտում տեղի ունեցավ Միջազգային «Լազարեւյան ակումբի» խորհրդի նիստը։ Հայաստանից ակումբի նիստին մասնակցում էին Վազգեն Մանուկյանը, Վիկտոր Սողոմոնյանը, Արամ Սարգսյանը եւ Արտաշես Գեղամյանը։
Ռուսական կողմից մասնակցում էին Կոնստանտին Զատուլինը, Սերգեյ Համբարձումյանը, Ալեքսանդր Գազազյանը, Վլադիմիր Կազիմիրովը, Լուսիկ Ղուկասյանը, Աշոտ Ջազոյանը, Սեյրան Բաղդասարյանը եւ այլոք։
Նիստի ընթացքում քննարկվել է Հայաստանում ստեղծված դրությունը՝ Ռուսաստանի, Հայաստանի եւ Ադրբեջանի միջեւ նոյեմբերի իննին ստորագրված եռակողմ Հայստարարությունից հետո, ինչպես նաեւ հարցեր, որոնք առնչվում են հայ-ռուսական հարաբերություններին եւ Հայաստանի ներքին քաղաքականությանը։ Բացի այդ, մասնակիցները քննարկել են Ռուսաստանի եւ Հայաստանի քաղաքացիական հասարակությունների միջեւ համագործակցության հնարավորությունները՝ Արցախի Հանրապետության՝ ռազմական գործողությունների հետեւանքով տուժած բնակչությանը օգնության ցուցաբերման հարցում։
Հիշեցնենք, որ մարտական գործողությունների սկսվելուց հետո «Լազարեւյան ակումբը» հայտարարել էր Հայաստանում եւ Ռուսաստանում կամավոր հանգանակություն՝ Արցախի բնակչությանը օգնելու համար։
Ներկայումս հավաքվել է մոտ 10 միլիոն ռուբլի։ Խորհուրդը որոշում է կայացրել շարունակել հանգանակությունը, իսկ հանգանակված գումարները օգտագործվելու են նպատակային կերպով՝ ըստ կոմիտեի որոշման, որի անդամ են Արցախի երեք նախագահները։
Կոնստանտին Զատուլինը նկատել է․ «Մենք կիսում ենք Հայ ժողովրդի ցավը եւ միաժամանակ հասկանում ենք, որ այլ լուծում, քան եռակողմ Հայտարարությամբ սահմանված դրույթների կատարումն է, այս փուլում գոյություն չունի։ Կարեւորը, ինչի հետ համաձայն են ակումբի բոլոր անդամները, այն է, որ Լեռնային Ղարաբաղում բոլոր տեսակի ռազմական գործողությունները դադարեցված են եւ այլեւս մարդիկ չեն մեռնում։ Մենք հասկանում ենք, որ Լեռնային Ղարաբաղի կարգավիճակը դեռ պետք է որոշվի եւ դա պարզ լուծում չէ։ Սրանով հանդերձ, այսօր հիմնական խնդիրը մնում է փախստականների վերադարձի հարցը, անօթեւան մնացած եւ հարազատներին կորցրած ընտանիքներին օգնության տրամադրումը։ Կարեւոր հարց է մնում նաեւ Ադրբեջանի ենթակայության տակ հայտնված տարածքներում մշակութային արժեքների պահպանման հարցը։ Ցանկանում ենք հանգստացնել հայ հանրությանը կապված այն բանի հետ, որ Թուրքիան չի մասնակցի խաղաղապահ գործողությանը, որը մի անգամ չէ, որ հայտարարել է Ռուսաստանի նախագահ Վլադիմիր Պուտինը, եւ լիազորված դիվանագետներն եւ զինված ուժերի ներկայացուցիչները»։
Հաջորդ նիստը կկայանա Հայաստանում, Հայաստանի ներքաղաքական կյանքի կայունացումից եւ համաճարակային իրավիճակի բարելավումից հետո հաջորդ տարվա առաջին կեսին։
Հետևեք մեզ Facebook-ում