Նոյեմբերի 21-ին Վրաստանում կկայանա խորհրդարանական ընտրությունների երկրորդ փուլը

Ընտրոթյունների առաջին փուլի նախնական հաշվարկների համաձայն ՝«Վրացական երազանքը» ստացել է  76 մանդատ և մեծամասնություն Վրաստանի խորհրդարանում: Փոքրամասնության մանդատ ստացած 5 կուսակցությունների ներկայացուցիչները հրաժարվում են խորհրդարան մտնել:

Ընդդիմությունը համաձայն չէ այս արդյունքի հետ և մտադիր է բոյկոտել ընտրությունների երկրորդ փուլը, հրաժարվել տասներորդ գումարման խորհրդարանում աշխատելուց: Խնդրի շուրջ ընդդիմության հետ հանդիպումներ են ունեցել ԵԱՀԿ խորհրդարանական վեհաժողովի պաշտոնյաներն ու  պատգամավորները` ընտրված ընդդիմության ներկայացուցիչներին հորդորելով վերադառնալ խորհրդարան և մասնակցել ընտրությունների երկրորդ փուլին:

Իրավիճակը չի հարթել նաև հատուկ այդ նպատակով ԱՄՆ պետքարտուղար Մայք  Պոմպեոյի հետ Վրաստան  ժամանած նրա  տեղակալ Ֆիլիպ Ռիկերը։

Իշխող կուսակցությունն ընդդիմության գործողությունները կործանարար է համարում, և նրան մեղադրում է իրավիճակն ապակայունացնելու և արհեստականորեն սրելու փորձերի մեջ:

ՆԳՆ-ն  հայտարարել է, որ նոյեմբերի 21-ին կապահովի  կարգուկանոնի ռեժիմը ամբողջ երկրում, որպեսզի յուրաքանչյուր քաղաքացի կարողանա կատարել իր ընտրությունն ազատ և անվտանգ միջավայրում: Հորդորել է ընտրությունների գործընթացին ներգրավված բոլոր անհատներին կամ կազմակերպություններին, անկախ իրենց քաղաքական հայացքներից, պահպանել օրենքը, ենթարկվել ոստիկանության օրինական պահանջներին և նպաստել խաղաղ ընտրությունների անցկացմանը:

Մինչդեռ ընդդիմության առաջնորդների հայտարարությունները բավականին անհաշտ են թվում, նրանք շարունակում են պահանջել  նոր ընտրություններ, և առայժմ չեղյալ չի հայտարարվել այս շաբաթ օրը ընտրությունների երկրորդ փուլի բոյկոտի որոշումը միամանդատ ընտրատարածքներում, ինչպես նաև նոր բողոքի ցույցերը:

Վրաստանի ընդդիմադիր կուսակցությունների ղեկավարներն այսօր կհանդիպեն Եվրամիության ԵՄ և ԱՄՆ-ի դեսպանների հետ։

Վրաստանում ընտրությունների երկրորդ փուլից հետո կարող է գալ քաղաքական ճգնաժամի նոր փուլ, կարծում է քաղաքագետ Արչիլ Գամզարդիան:

 Zham.am