Առաջնագծի այն հատվածներում, որտեղ եղել են կանոնավոր զորքեր, նահանջներ չեն եղել. Մովսես Հակոբյան

Առաջնագծի այն հատվածներում, որտեղ եղել են կանոնավոր զորքեր, այդտեղ կամ նահանջներ չեն եղել, կամ եղել են քիչ։ Այս մասին այսօր՝ նոյեմբերի 19-ին, լրագրողների հետ զրույցում նշեց ՀՀ ՊՆ ռազմական վերահսկողական ծառայության արդեն նախկին պետ, ԳՇ նախկին պետ Մովսես Հակոբյանը:

Նրա խոսքով՝ այսօր պատերազմից վերադարձած շատ մարդիկ հարցազրույցներ են տալիս, որը իրենց չի վերաբերվում, մասնավորապես, երբ զինվորը սկսում է քննարկել ԳՇ պետի որոշումները:

«Պատերազմի դաշտում զինվորը սնվում է պատերազմ վարելուն զուգահեռ՝ մի ձեռքի զենքը, մյուսում հացը, իսկ լուսանկարները, որ գետնին հանգիստ նստած սնվում են, դա խորքում է: Իրար գլխի հավաքված սննդի կազմակերպումը նաեւ հանցագործություն է, որովհետեւ բոլորին հրահանգված է, որ 2-3 հոգուց ավելի չպետք է մի տեղ կուտակվեն, որովհետեւ մեր հնարավորությունը օդում լուրջ պրոբլեմատիկ է եղել:

Մենք այս օրին հասանք նաեւ այն պատճառով, որ լրագրողները հարցազրույցների են հրավիրում մարդկանց, որոնք բանակում չեն ծառայել, բանակի կառուցվածքի եւ այլնի մասին պատկերացում չունեն, սակայն բանակի բարեփոխման առաջարկներ են անում: Բանակը հաղթելու արվեստ է սովորեցնում, ոչ թե սնվելու կամ լավ ապրելու»,-ընդգծեց նա՝ հավելելով, որ հաղթելու համար գիտելիք եւ ունակություն է պետք, հնարավոր չէ 20 հոգով ջոկատ կազմել ու գնալ հաղթել:

Zham.am