Եռակողմ հայտարարությունը ստորագրելուց հետո էլ մարդիկ շարունակում են գերեվարվել․ «Լուսավոր Հայաստան»

Եռակողմ հայտարարությունը ստորագրելուց հետո էլ մարդիկ շարունակում են գերեվարվել։ Այս մասին նոյեմբերի 17-ին ԱԺ նիստում ասաց «Լուսավոր Հայաստան» կուսակցության ղեկավար ԼՀ խմբակցության հախագահ Էդմոն Մարուքյանը՝ հիշեցնելով Գորիս-Շուշի ճանապարհի հատվածում անհետ կորած 10 քաղաքացիների մասին, որոնց հարցով Հայաստանը դիմել է ՄԻԵԴ։

Ընդ որում, նրա խոսքով, խորհրդարանը միակ մարմինն է, որը հանրապետության վարչապետից վեր է կանգնած։

«Խորհրդարանը պետք է քննարկի այդ հայտարարությունը եւ իրազեկի, որ քանի որ ավելի վաղ ստորագրված հայտարարության կետերն արդեն խախտվել են, ապա մենք, օրինակ, պետք է մեզ վերապահենք Լաչինի միջանցքից դուրս գալու նպատակահարմարությունը վերանայելու իրավունքը։ Կարո՞ղ է խորհրդարանն այս հարցը քննարկել, թե՞ ոչ։ Կարծում եմ՝ այո, կարող է։ Իսկ ինչո՞ւ չի քննարկում։ Մենք նիստ ենք գումարում, իսկ դուք չեք գալիս։ Ուրեմն՝ ինչո՞ւ չեք գալիս»,- դժգոհեց Մարուքյանը։

Նա նաեւ առաջարկեց, որ իշխող «Իմ քայլը» դաշինքը այդ հայտարարության կետերը պահպանելու, ինչպես նաեւ դրա իրավաչափության հարցով արտահերթ նիստ հրավիրի։

«Հայտարարությունը ստորագրելուց հետո անցել է 7 օր։ Արդեն հազարավոր խախտումներ կան։ Խորհրդարանը, որի իրավական ուժն ավելի բարձր է, քան այդ ստորագրված փաստաթուղթը, կարող է հայտարարություն ընդունել եւ դրանից բխող գործընթացներ գործարկել։ Ես կարծում եմ, որ խորհրդարանը կարող է դա անել։ Մենք չենք առաջինը խախտել փաստաթղթում ամրագրված պահանջները։ Նրանք մարդկանց են գերեվարել։ Տվյալներ կան, որ վերջին 2 օրում Քարվաճառ են թափանցում դիվերսիոն խմբեր։ Սա խախտում է, ինչի մասին պետք է խոսել»,- հայտարարեց Մարուքյանը։

Պատգամավրոը միաժամանակ նշեց, որ այսպես հավերժորեն չի կարող շարունակվել։

«10 մարդ գերի է ընկել ձեր կողմից ստորագրված հայտարարությունից հետո։ Որտե՞ղ է ձեր խոստացած խաղաղությունը։ Ո՞վ է այն պահպանում»,- շեշտեց խորհրդարանականը։

Նշենք, որ «Բարգավաճ Հայաստան» եւ «Լուսավոր Հայաստան» կուսակցությունների պատգամավորները բոյկոտել են Ազգային ժողովի այսօրվա օրակարգը եւ նոյեմբերի 17-ին ցուցադրաբար հեռացել խորհրդարանի նիստերի դահլիճից։

Նրանք մասնավորապես պահանջում են վարչապետ Նիկոլ Փաշինյանի հրաժարականը եւ պնդում արտահերթ նիստի անցկացում։