Դատախազները չեն ցանկանում մասնակցել դավաճանական գործողություններին, խառը վիճակ դատախազությունում

«Փաստինֆո»-ի տեղեկություններով՝ մի շարք դատախազներ հրաժարվում են մասնակից դառնալ քաղաքական հետապնդումներին եւ դավաճանական գործողությունների մաս կազմել: Ու հենց սրանով է պայմանավորված, որ ՀՀ գլխավոր դատախազի տեղակալ Գեւորգ Բաղդասարյանը անձամբ էր ներկայացել դատարան եւ մասնակցել Նիկոլ Փաշինյանի սպանության ենթադրյալ նախապատրաստման գործով ձերբակալման որոշումների դեմ պաշտպանների ներկայացրած բողոքների քննությանը: Սա աննախադեպ երեւույթ է, որ գլխավոր դատախազի տեղակալը ընդհանուր իրավասության դատարանում մասնակցի ձերբակալման որոշման դեմ բողոքի քննարկմանը:

Ակներեւ է, որ գործերը հարուցվում են, իսկ նախաքննությունը կատարվում է ամենաբարձր օղակների հանձնարարությամբ եւ խնդիր է դրված հասնել իրենց ուզածին՝ ընդդիմադիր գործիչների ազատազրկմանը ամեն գնով։ Ստորին օղակների դատախազներն անհանգստացած են, որ ոչ միայն պատասխանատվության են ենթարկվելու ապօրինությունների համար, այլեւ իրենց անունը կապվելու է երրորդ հանրապետության ամենամեծ դավաճանության հետ:

Ի դեպ, դատարանների գործողությունները` ձերբակալությունները ոչ իրավաչափ ճանաչելու, կալանավորումները մերժելու մասին, ավելի է խորացրել դատախազների շրջանում բողոքները, որ գլխավոր դատախազն իրենց «դեմ է տվել» պատին ու զոհաբերում է հանուն Փաշինյանի:

Արթուր Վանեցյանին արգելանքից ազատելը, Վահրամ Բաղդասարյանին չկալանավորելը լուրջ ապտակ էր ՀՀ գլխավոր դատախազության ղեկավարությանը։