Փողոցներում լարված է․տեղային բախումներ

Վաղ առավոտից մայրաքաղաքի տարբեր հատվածներում մարդիկ հրապարակավ քնննարկում են տեղի ունեցածը։ 45-օրյա պատերազմի սթրեսը, շոկը, կորուստները, զոհերը, հայրենիքի մի մասի կորուստը մարդկանց գերլարված ու ագրեսիվ են դարձրել։ Մի քանի վայրերում ականատես եղանք տեսարանի, երբ տաքսու վարորդը հետևից եկավ և հարվածեց վարորդին, որ բարձրաձայն հեռախոսով ասում էր՝ «ցավդ տանեմ, Նիկոլի հետ ենք»։ Իսկ մի կին այս ամենը դիտելով՝ բարձրաձայն արտասվում էր՝ գոռալով՝ քաղաքացիական պատերազմն էլ ինչպե՞ս է լինում։

«Հրապարակը» հասարակության ներսում և փողոցում այս տրամադրությունների մասին զրուցեց ՀՀ առաջին օմբուդսմեն Լարիսա Ալավերդյանի հետ, որը հայտնեց, որ պատրաստվում է զանգահարել քաղաքացիական բախումները կանխելու նպատակով քաղաքացիական խորհուրդ ստեղծելու առաջարկով հանդես եկած Կոմանդոսին։

«Ես կարծում եմ, նախ, այդ քաղաքացիական խորհուրդը պետք է ստեղծվի՝

շատ արագ, հնարավոր է՝ 17 կուսակցություններն էլ միանան, ես և՛ Վազգենի հետ Մանուկյան, և՛ Լիլիթի հետ Գալստյան խոսել եմ, տեսնենք՝ ինչ ենք անում։ Ես ինքս պատրաստ եմ վերցնել այդ քաղաքացիական պատասխանատվության համեստ լուման ինձ վրա»,-ասաց Լարիսա Ալավերդյանը։

Անդրադառնալով Նիկոլ Փաշինյանի այն հայտարարությանը, որտեղ նա, ըստ էության, կոչ էր անում, որ ՀՀ քաղաքացիները իրենց կորուսյալ հայրենիքի վրեժը լուծեն ջարդարարներից, ՀՀ առաջին օմբուդսմենը մեկնաբանեց․«Սա քաղաքացիական պատերազմի կոչ է։ Մենք պետք է մերժենք, համարենք, որ դա անհավասարակշիռ վիճակում գտնվող, վարչապետի պաշտոնը զբաղեցնող մարդու կողմից, իրավական առումով՝ առոչինչ ճիչեր են»։

Լարիսա Ավալերդյանին հարցրեցինք՝ իսկ մտավախություն չունի՞, որ վաղը 17 կուսակցությունների հանրահավաքին լինեն բախումներ։

«Ոչ»,-ասաց Լարիսա Ալավերդյանն ու ավելացրեց․ «Որովհետև ով ինչ անի, իրեն է անելու։Մենք պետք է պատրաստ լինենք վարձկանների դեմ, ոչ միայն սահմաններում, այլև ներսում պայքարել։ Նրանց թիվը մեր մեջ 1-2 տոկոս է, բայց դա էլ է շատ։ Բավական է 1-2 տոկոս ահաբեկիչ վարձկան քո երկրի մեջ լինեն, որ իրականացվեն ամենադաժան սցենարները։ Բայց ես կոչ եմ անում 90-95 տոկոսին իրենց ողջ կազմակերպական, կամային և այլ որակները ցուցաբերելով՝ ուղղակի չեզոքացնեն այդ վտանգը»,-ասաց Լարիսա Ալավերդյանը։

Նա ֆիզիկապես ներկա է լինելու հանրահավաքին՝ փորձելով չեզոքացնել հնարավոր լոկալ կռիվները։ «Իհարկե պատրաստ եմ, առաջին անգա՞մ եմ քաշքշոցների մեջ հայտնվում»,-ասաց ՀՀ առաջին ՄԻՊ-ը՝ ափսոսանք հայտնելով, որ չի կարողանալու գիշերային ակցիաներին մասնակցել, քանի որ նոր-նոր է ապաքինվել կորոնավիրուսից։

«Հրապարակ»