«Երևանը պատրաստ է ցանկացած երկրի դեսպանին դեմ առ դեմ ցույց տալ Լեռնային Ղարաբաղում գերեվարված գրոհայիններին». Ալեն Սիմոնյանը՝ ТАСС - ին

Երևանը պատրաստ է ցանկացած երկրի դեսպանին դեմ առ դեմ ցույց տալ Լեռնային Ղարաբաղում գերեվարված գրոհայիններին: Այս մասին ՏԱՍՍ գործակալությանը հայտնել է ՀՀ ԱԺ փոխխոսնակ Ալեն Սիմոնյանը:

Վերջինիս խոսքով՝ այսօր արդեն փաստ է, որ Ղարաբաղում ահաբեկիչներ են գործում:

«Մենք Սիրիայից և Լիբիայից գերեվարված վարձկաններ ունենք, որոնք ամեն ինչի մասին պատմում են: Հայաստանը պատրաստ է ցանկացած դեսպանի՝ ռազմական գործողությունների ժամանակ գերեվարված ահաբեկիչների հետ շփման հնարավորություն տալ: Որպես իշխանության ներկայացուցիչ՝ անձամբ ստանձնում եմ նման հանդիպման կազմակերպման պարտավորությունը»,-ասել է Սիմոնյանը:

Բացի այդ փոխխոսնակը նշել է, որ ներկայում հավանական չի համարում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը:

Ավելի վաղ «Հրապարակ»-ը հաղորդել էր, որ երեկ առավոտյան ԱԺ «Իմ քայլը» խմբակցության պատգամավորներ, ԱԺ փոխնախագահ Ալեն Սիմոնյանը, պետաիրավական հարցերի հանձնաժողովի նախագահ Վլադիմիր Վարդանյանը հրատապ այցով մեկնել են Մոսկվա։ Լուրը հաստատել են «Իմ քայլի» պատգամավորները։

Խորհրդարանական աղբյուրներն ասել են նաև, որ հայ պատգամավորների մոսկովյան այցի նպատակը ռուս գործընկերների հետ շփումն է, ուզում են հասկանալ տրամադրությունները, և եթե հնարավոր է, նաև աջակցություն խնդրել։

Սակայն պարզվում՝ պատգամավորների այցը պաշտոնական չէ, այլ՝ մասնավոր։

Աղբյու՝ Tert.am