Ձայների հաշվարկի առաջին գիշերից հետո ԱՄՆ նախագահական ընտրությունների ակնհայտ առաջատարը որոշված չէ. LIVE

Ձայների հաշվարկի առաջին գիշերից հետո ԱՄՆ նախագահական ընտրությունների ակնհայտ առաջատարը որոշված չէ՝ Ջո Բայդենը ընտրողների միայն աննշան ձայներով է գերազանցում Դոնալդ Թրամփին: Երկու թեկնածուներն էլ սպասելիորեն հաղթել են այն նահանգներում, որոնք ավանդաբար քվեարկում են հանրապետականների կամ դեմոկրատների օգտին, հայտնում է BBC-ն:

Ընտրությունների արդյունքը կորոշվի «տատանվող» նահանգներում գրանցված արդյունքներով: Դոնալդ Թրամփը հաղթել է կարեւոր՝ Օհայոյ, Տեխաս եւ Ֆլորիդա նահանգներում: Դեռ իրենց խոսքը պետք է ասեն Արիզոնան, Ջորջիան եւ Փենսիլվանիան:

Քվեարկության եւ ձայների հաշվարկի կանոնները տարբեր են բոլոր 50 նահանգներում: Շատ նահանգներում փոստով քվեաթերթիկները մնում են չհաշված:

Թրամփն իրեն ժամանակից շուտ հաղթող է ճանաչել եւ պատրաստվում է Գերագույն դատարանի միջոցով հասնել ձայների հաշվարկի ավարտին՝ ասելով, որ ընտրական հանձնաժողովները փորձում են խաբեություն իրականացնել:

Նախագահին, ի վերջո, ընտրում է ընտրական կոլեգիան: Թեկնածուն, ով նահանգում հաղթում է թեկուզ մեկ ձայնի առավելությամբ, ստանում է այդ նահանգի բոլոր ընտրողների ձայները (բացառությամբ Նեբրասկայի եւ Մեյնի)

Ընտրական կոլեգիայում 538 տեղ է: Ով հավաքում է դրանում առնվազն 270 ձայն (կեսը գումարած մեկ ձայն), նա հաղթում է: Այս պահին Բայդենն ունի 227 ընտրական ձայն, Թրամփը՝ 213:

Ընտրություններում հաղթողը կարող է չորոշվել եւս մի քանի օր կամ նույնիսկ շաբաթներ: Որոշ նահանգներ մինչեւ նոյեմբերի քսանը ժամանակ են վերցրել ձայները հաշվելու համար:

Անցկացվում են նաեւ Ներկայացուցիչների պալատի ընտրություններ, եւ վերընտրվում է սենատորների մեկ երրորդ մասը: Դեմոկրատներն ակնկալում են մեծամասնություն ստանալ Սենատում, բայց մինչ այժմ նրանց հաջողվել է ավելացնել միայն մեկ ձայն:

News.am