Գարեգին Բ–ն ընդունել է Հայրապետական կրթաթոշակին արժանացած ուսանողներին

Գարեգին Բ Ամենայն Հայոց Կաթողիկոսը ապրիլի 10-ին Մայր Աթոռ Սուրբ Էջմիածնում ընդունել է Ամենայն Հայոց Կաթողիկոսի կողմից սահմանված Հայրապետական կրթաթոշակին այս տարի ներկայացված Հայաստանի բուհերի երեք ուսանողների` ուղեկցությամբ ՀՀ Կրթության եւ գիտության նախարար Լեւոն Մկրտչյանի եւ Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանի:

Ուսման ընթացքում ցուցաբերած բարձր առաջադիմության համար կրթաթոշակ է շնորհվել Սյուզաննա Իսրայելյանին (Երեւանի պետական համալսարան, բակալավրի 4-րդ կուրս), Գոhար Մանուկյանին (Երեւանի Մ. Հերացու անվան պետական բժշկական համալսարան, բակալավրի 2-րդ կուրս) եւ Անի Մկրտչյանին (Երեւանի Կոմիտասի անվան պետական կոնսերվատորիա, բակալավրի 1-ին կուրս): Վերջիններիս Հայոց Հայրապետին ներկայացրել է Վարդան եպիսկոպոսը՝ հայցելով Ամենայն Հայոց Կաթողիկոսի օրհնությունը:

Ապա Նորին Սրբությունն իր օրհնությունն ու գնահատանքն է բերել ուսանողներին՝ շնորհավորելով նրանց ուսման մեջ արձանագրած առաջադիմության առիթով եւ հորդորելով նույն ոգով, նվիրումով ու նախանձախնդրությամբ շարունակել իրենց ուսումնառությունը։

«Ուրախություն եւ հոգու մխիթարություն է Մեզ համար, որ Կրթության եւ գիտության նախարարության կողմից այսպիսի հնարավորություն է ընձեռվել Մայր Աթոռ Սուրբ Էջմիածնին, որպեսզի իր փոքրիկ ներդրումն ունենա նաեւ բարձրագույն կրթության ոլորտում:

Սա առանձնահատուկ խորհուրդ ունի Մայր Աթոռի համար՝ աջակից լինել այն ուսանողներին, որոնք ուսումնական տարվա ընթացքում լավագույն արդյունքներն են գրանցել, նրանց բերել Սուրբ Էջմիածնի օրհնությունը», - նշել է Վեհափառ Հայրապետը՝ իր գնահատանքը հայտնելով նաեւ ԿԳ նախարար Լեւոն Մկրտչյանին՝ նախարարության եւ Հայաստանյայց Առաքելական Սուրբ Եկեղեցու միջեւ ձեւավորված արդյունաշատ գործակցության համար։

Իր խոսքում Գարեգին Բ Կաթողիկոսը, անդրադառնալով կրթության կարեւորությանը, Հայրապետական կրթաթոշակակիրներին կոչ է արել ստացած կրթությունն ապագային ծառայեցնել ոչ միայն իրենց անձերի եւ անձնական բարեկեցության ապահովման համար, այլ նաեւ ստացված գիտելիքներով ու հմտություններով մասնակից դառնալ հայրենի երկրի առաջընթացին ու ժողովրդի բարօր կյանքի կերտմանը։

Իր հերթին ԿԳ նախարար Լեւոն Մկրտչյանն իր խորին երախտագիտությունն է հայտնել Նորին Սրբությանը՝ ընդգծելով, որ բարի ավանդություն է ձեւավորվել, որը շատ ոգեւորիչ եւ հիշարժան է կրթաթոշակի արժանացող ուսանողների համար։

Հանդիպման վերջում Վեհափառ Հայրապետը յուրաքանչյուր ուսանողին Աստվածաշունչ մատյան է նվիրել եւ հանձնել կրթաթոշակի վկայականները։