Դավթաշենում հատվել էր 5 բարդի, 24 թեղի. պատճառվել է 2 մլն 860 հազար դրամի վնաս

Երեւանի Դավթաշեն վարչական շրջանի տարածքում նախօրեին տեղի ունեցած ապօրինի ծառահատումների առթիվ Բնապահպանության նախարարությունը պարզաբանում է տարածել։

Պարզաբանման մեջ մասնավորապես ասվում է. «Նախարարության բնապահպանական պետական տեսչության աշխատակիցները ժամանել են դեպքի վայր եւ պարզել, որ հատվել է 29 ծառ, որից 3-ը հիմքից, իսկ 26-ը մոտ 2 մ բարձրությամբ: Հատվել է 5 բարդի եւ 24 թեղի:

ՀՀ բնապահպանության նախարարության աշխատակիցները հաշվարկել են շրջակա միջավայրին հասցված վնաս՝ 2 մլն 860 հազար դրամի չափով: Բնապահպանական պետական տեսչության կողմից նյութեր են նախապատրաստվել իրավապահ մարմիններին փոխանցելու եւ գործին համապատասխան ընթացք տալու նպատակով»:

Ավելի վաղ ոստիկանության լրատվական ծառայությունը հաղորդագրություն էր տարածել, որ ձեռնարկված միջոցառումների եւ որոնողական աշխատանքների արդյունքում պարզվել է, որ արարքը կատարել է 51-ամյա Ա. Ս.-ն, որն ապրիլի 10-ին առավոտյան Դավթաշենի 36/2 հասցեի մոտ հայտնաբերվել եւ բերման է ենթարկվել ոստիկանության Մաշտոցի բաժին:

Նյութերն ուղարկվել են Երեւանի Աջափնյակ եւ Դավթաշեն վարչական շրջանների դատախազություն: