Եղել է ստեղծված իրավիճակի քննարկում. Միքայել Մելքումյանը` Նիկոլ Փաշինյանի հետ փակ հանդիպման մասին

Հանդիպումը եղել է այստեղ՝ ԱԺ շենքում, տեւել է մոտ 2 ժամ, քննարկվել է ստեղծված իրավիճակը, հնչեցվել են հարցեր, ելքերը՝ ինչ պետք է անել, քաղաքական ամենատարբեր հարցերից սկսած մինչեւ ռազմական բնույթի հարցեր են հնչեցվել։ Այս մասին այսօր՝ հոկտեմբերի 12-ին, լրագրողների հետ զրույցում ասաց ԲՀԿ պատգամավոր Միքայել Մելքումյանը՝ անդրադառնալով ՀՀ վարչապետ Նիկոլ Փաշինյանի հետ փակ հանդիպման մասին։

Պատգամավորը նշեց, որ հանդիպման մասին կարող է միայն այդքանն ասել

Անդրադառնալով Արցախի անկախությունը ճանաչելու վերաբերյալ Արցախի նախագահ Արայիկ Հարությունյանի հայտարարությանը՝ Մելքումյանն ասաց. «Իմ կարծիքը կարող եմ հայտնել, որ Արցախի անկախությունը ճանաչումը դիտարկում ենք այս փուլում որպես Արցախի ժողովրդի անվտանգությունը եւ էթնիկ զտումը բացառող գործոն։ Սա պետք է լինի անվտանգության երաշխիք։ Այս պատերազմի առանձնահատկությունն այն է, որ արդեն թուրք-արդրբեջանական տանդեմի դեմ ենք մենք պատերազմ վարում։ Այստեղ միջազգային հստակ տեռորիզմի դրսեւորում է»։

Միքայել Մելքումյանը շեշտեց, որ մեր արտաքին քաղաքականությունը, արտերկրում բողոքի ցույցեր իրականացնող հայերը պետք է իրենց ուղղությունը վերցնեն՝ առաջիկա մի քանի օրերի ընթացքում Արցախի անկախության ճանաչման հարցը բարձրացնելը. «Որեւէ երկիր ճանաչի եւ դրա ճանաչումից հետո արդեն հստակ է, որ մենք անպայման պետք է ճանաչենք։ Մի քանի օր առաջ Գագիկ Ծառուկյանը հայտարարեց, որ ՌԴ-ի հետ լայն թափով պետք է վերականգնենք ռազմավարական գործընկերոջ եւ դաշնակցի հարաբերությունները։ Այսինքն՝ ՌԴ-ի ներկայությունն այս տարածքում պետք է լրիվ վերականգնվի։ Թուրքիան փորձ է անում Ադրբեջանին սրա միջոցով պոկի տարածաշրջանից։ Ինքը լայն թափով պետք է զսպվի»։

Աղբյուր` News.am