Ադրբեջանի Գլխավոր դատախազությունը քրեական գործ է հարուցել Արցախում ռազմական իրավիճակը լուսաբանող ռուսաստանցի լրագրող Պեգովի դեմ

Համացանցում տեղեկատվություն է հայտնվել այն մասին, որ Ադրբեջանի Գլխավոր դատախազությունը քրեական գործ է հարուցել Wargonzo նախագծի հեղինակ, ռուսաստանցի ռազմական լրագրող Սեմյոն Պեգովի դեմ, որը պատերազմի առաջին իսկ օրերից ակտիվ լուսաբանում է ռազմաճակատում տիրող իրավիճակը հայկական կողմից:

Սեմյոն Պեգովն է եղել այն փոքրաթիվ արտասահմանյան լրագրողներից մեկը, որը բացահայտել է Ադրբեջանի նախագահ Իլհամ Ալիևի այն սուտ հայտարարությունը, թե իբր Հադրութն անցել է ադրբեջանական զինուժի վերահսկողության տակ:

 

Բացի այդ նա ակտիվ լուսաբանում է Արցախի բնակավայրերում խաղաղ բնակչության դեմ Ադրբեջանի ռազմական հանցագործությունները:

 

Սեմյոն Պեգովն այդ լուրը դեռ չի մեկնաբանել: 

 

Ավելի վաղ «Девичья башня» Telegram-ալիքի հեղինակ Սադատ Գուլիևը Սեմյոն Պեգովի մահն է ցանկացել, ինչը քննադատության է արժանացել Ռուսաստանի մեդիադաշտի մի շարք հայտնի ներկայացուցիչների կողմից: 

Այսօր՝ հոկտեմբերի 12-ին, արդեն իսկ հայտնի է դարձել, որ ՌԴ Քննչական կոմիտեն քննություն է անցկացնում Գուլիևի արտահայտությունների վերաբերյալ Սեմյոն Պեգովի հասցեին: 

Ինչպես նշվում է, Քննչական կոմիտեն դա կդիտարկի 282-րդ հոդվածի շրջանակներում՝ «Ատելության կամ թշնամանքի սերմանում» և, եթե քննիչները գործ հարուցեն, ապա Գուլիևին սպառնում է տուգանք կամ ազատազրկում: