Գագիկ Ծառուկյանի նկատմամբ շարունակվող քաղաքական հետապնդումը պետք է անհապաղ դադարեցվի. «Հայրենիք» կուսակցություն
Գագիկ Ծառուկյանի նկատմամբ շարունակվող քաղաքական հետապնդումը պետք է անհապաղ դադարեցվի: Այս մասին ասվում է «Հայրենիք» կուսակցության հայտարարության մեջ:
««Հայրենիք» կուսակցությունը դատապարտում է «Բարգավաճ Հայաստան» կուսակցության նախագահ Գագիկ Ծառուկյանի նկատմամբ շարունակվող քաղաքական հետապնդումը։ ԲՀԿ նախագահ Գագիկ Ծառուկյանը շինծու մեղադրանքով շարունակում է մնալ բանտարկված։
Օրհասական այս շրջանում, երբ ազգը մեկ բռունցք դարձած պայքարում է թուրք-ադրբեջանական ռազմական ագրեսիայի դեմ, 13 կուսակցություններ, այդ թվում՝ «Հայրենիք»-ը, կարևորելով պետության և բանակի շուրջ քաղաքական ուժերի համախմբման, ներազգային հաշտության և համերաշխության հրամայականը, դիմելով ՀՀ գլխավոր դատախազին, միջնորդել էին փոխել Գագիկ Ծառուկյանի խափանման միջոցը, որը մնաց առանց արձագանքի։
Խստորեն դատապարտելով վարչախմբի կողմից ժողովրդի պառակտման արատավոր վարքագծի շարունակումը՝ կրկին պահանջում ենք անհապաղ ազատ արձակել «Բարգավաճ Հայաստան» կուսակցության ղեկավար Գագիկ Ծառուկյանին»,- նշված է հայտարարության մեջ։
Հետևեք մեզ Facebook-ում