Ադրբեջանը «սարքեց» ինքն իր գլխին

«Փաստ» օրաթերթը գրում է. «Արդեն ոչ միայն միջազգային մամուլում, այլև տարբեր պետությունների կողմից ամենաբարձր մակարդակով բարձրաձայնվում է այն մասին, որ Արցախում ընթացող պատերազմական գործողություններին թշնամու կողմից կռվում են վարձկաններ, որոնք բերվել են գլխավորապես Սիրիայից, Լիբիայից, Աֆղանստանից։ Թերթն իր նախորդ հրապարակումներում արդեն անդրադարձել էր վարձկանների՝ մեր տարածաշրջան թափանցելու ռիսկերի մասին, և ահա այս առնչությամբ նոր մանրամասներ են հրապարակ գալիս։

Ըստ տեղեկությունների, այս օրերին, պարզվում է, ահաբեկիչ-վարձկաններն արդեն զանգվածաբար թալան են իրականացնում ադրբեջանական բնակավայրերում, հիմնականում այն հատվածներում, որտեղից բնակչությունն արդեն իսկ տարհանված է կամ պարզապես փախել են իրենց բնակավայրերից՝ տեսնելով ադրբեջանական բանակի ձախողումները ։ Հատկանշականն այն է, որ համատարած թալանն ուղեկցվում է մարդկանց տներն ավիրելով ու բավականին մեծ չափերի հասնող հրկիզումներով։ Ըստ էության, ահաբեկիչների համար միևնույնն է, թե որտեղ և ինչ են թալանում ու հրկիզում, նրանց համար կարևորը տվյալ փուլում այն գումարն է, որը նրանք պետք է ստանան «գործարքն» ավարտելուց հետո, ինչպես նաև այն ավարը, որը կտանեն իրենց հետ հենց իրենց վճարող երկրի բնակավայրերը թալանելով։

Թեպետ, ինչպես արդեն քանիցս նշվել է, վարձկաններն ի վերջո հազիվ թե ողջ վերադառնան, քանզի կա՛մ կսպանվեն առաջնագծում, կա՛մ նրանց կվերացնեն հենց վարձողները՝ ջնջելով հետքերը: Ակնհայտ է, որ Ադրբեջանը «սարքեց» ինքն իր գլխին, քանի որ վարձկաններն արդեն իսկ դարձել են պատուհաս։ Թեպետ ավելի ճիշտ կլինի ասել՝ Թուրքիան «սարքեց» Ադրբեջանի գլխին: Բայց դա նրանց ներքին խնդիրն է: Ամենամտահոգիչը, սակայն, այն է, որ ընդհանրապես վարձկանահաբեկիչները գնալով մեծ պատուհաս են դառնում ողջ աշխարհի համար»։

Մանրամասները՝ թերթի այսօրվա համարում