Եթե ՀՀ-ի կողմից Արցախի ճանաչումը բերելու է առնվազն մեկ գերտերության կողմից անվտանգության երկաթյա երաշխիքի տրամադրման, պետք է անհապաղ ճանաչել Արցախի անկախությունը. Սամվել Ֆարմանյան. Տեսանյութ

Պատերազմն ինքնին ավելի շատ քաղաքական, ապա միայն ռազմական ակտ է, այն մղվում է քաղաքական նպատակների համար. ռազմական դրությամբ պայմանավորված՝ միշտ չէ, որ մենք ամբողջական տեղեկատվություն ունենք, բայց փաստ է՝ Ադրբեջանը՝ որպես նախահարձակ կողմ, ձախողել է իր նպատակի իրականացումը: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ ԱԺ նախկին պատգամավոր Սամվել Ֆարմանյանը:

«Ապագա բանակցությունների հիմքում ընկած են լինելու ռազմական իրողությունները, թե մեր զինուժն ինչ հաջողություններ է արձանագրել: Ամեն ինչ կախված է ռազմաճակատից, և մեր զինուժը, թիկունքում ունենալով համայն հայության ներուժը, փայլուն լուծում է մարտական խնդիրները»,- ասել է քաղաքական գործիչը:

Ըստ Ֆարմանյանի՝ միջազգային հանրությունից հասցեական արձագանքների բացակայությունը մեզ չպետք է հիասթափեցնի. «Որպես իմաստնացած ժողովուրդ՝ մենք պետք է հասկանանք, որ միջազգային հարաբերություններում անիրատեսական սպասելիքներ պետք չէ ունենալ: ՀԱՊԿ-ին դիմելու հարցն օրակարգում է, քանի որ գործ ունենք ակտիվ պատերազմական վիճակի հետ: Ելնելով զարգացող ռազմաքաղաքական իրողություններից՝ մենք ըստ անհրաժեշտության պետք է դիմենք ՀԱՊԿ-ին և ակնկալենք գործուն աջակցություն»:

Նախկին պատգամավորի կարծիքով՝ որևէ որոշում կայացնելիս, օրինակ՝ Արցախի ճանաչման, պետք է դրսևորել ծայրաստիճան սառնասրտություն, քաղաքական երկարաժամկետ հաշվարկներ կատարելու տաղանդ. «Արցախի ճանաչման հարցի քննարկումը բացվել է, քանի որ բանակցային մյուս կողմն ապակառուցողական և առավելապաշտական դիրքորոշում ունի: Եթե այդ ճանաչումն ինքնաբերաբար բերելու է առնվազն մեկ գերտերության կողմից ճանաչման, անվտանգության և քաղաքական նոր իրավիճակի արձանագրման երկաթյա երաշխիքի, պետք է անհապաղ ընդունել այդ որոշումը»:

Սամվել Ֆարմանյանի պնդմամբ՝ բանակցային տրամաբանությունն ուղիղ համեմատական է լինելու պաշտպանական այն նոր բնագծի հետ, որը կձևավորի մեր զինուժը. «Մենք պետք է այնպիսի բնագիծ ձևավորենք, որը շատ ամուր հիմքերի վրա կդնի հայկական կողմի մոտեցումները բանակցային գործընթացում: Մենք մշտապես ասել ենք, որ կողմ ենք խնդրի քաղաքական կարգավորմանը, բալանսավորված քննարկմանը, որտեղ կերաշխավորվեն բոլոր կողմերի շահերը: Մենք պետք է ավելացնենք մեր ներգրավվածությունն ու նախաձեռնողականությունը ԵԱՀԿ Մինսկի խմբի միջնորդական գործընթացում»:

Քաղաքական գործչի պնդմամբ՝ այսօր ՌԴ-ն Հարավային Կովկասում ամենամեծ ռազմաքաղաքական ազդեցություն ունեցող պետությունն է, և Հայաստանը պետք է ակտիվորեն աշխատի իր ռազմավարական դաշնակցի հետ: «Թուրքիան նոր տարածաշրջանային հավակնություն է ներկայացնում, իր բոլոր ռեսուրսները դրել է Ադրբեջանի տիրապետության տակ: Հայ-ռուսական ռազմավարական դաշնակցությունը մնում է այն միակ գործոնը, որն ունակ է չեզոքացնելու Թուրքիայի կողմից էլ ավելի մեծ արկածախնդրության դիմելը: Սա է իրականությունը, սա է մեր պետական և ազգային շահը»,- ամփոփել է նախկին պատգամավորը: