Իշխանափոխության հասնելու ճանապարհը վարչապետի հրաժարականն է, որին օրենքով հասնելու ենք, հետադարձ ճանապարհ չկա․ Գևորգ Պետրոսյան

ԲՀԿ-ն երբեք հետ չի կանգնել իր նպատակներից, եթե ինչ-որ առումով դադար է վերցրել, ապա դա եղել է բացառապես ժողովրդի շահը գերակա համարելու խնդրով, իսկ հետ կանգնելու խոսակցությունները պարզապես բամբասանք է և ծիծաղելի է: Այս մասին Tert․am-ի հետ զրույցում ասաց «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով ԲՀԿ-ի նախատեսած քայլերին:

«Եթե մի բան պարոն Ծառուկյանը հայտարարել է և հակառակը չի ասել, ուրեմն դա նշանակում է, որ  նախորդ հայտարարությունները մնում են ուժի մեջ»,-ասաց նա: Ինչ վերաբերում է նրան, որ Գագիկ Ծառուկյանը ամռան սկզբին խոսում էր կառավարության կազմի 100 տոկոս փոփոխության անհրաժեշտության մասին, հիմա տարբեր ոլորտների փոփոխությունների մասին է նշում, Գևորգ Պետրոսյանը նշեց, որ մեկը մյուսին չի հակասում: Նա նշեց, որ ցանկացած քայլ օրենքի շրջանակներում կարելի է սպասել:

«Իրենք ժողովրդի մեջ վախենում են հայտնվել, քանի որ ժողովուրդը իրենց կծեծի, դրա համար նրանք ժողովրդի կողմից ընդունված մարդկանց չեն սիրում, իրենց թողնեն մենակ սելֆի անեն:

Փոխանակ մտածեն երկիրը կարգի բերելու մասին, ընկել են Ծառուկյանի հետևից, լավ ամոթ է, որքան կարելի է այդպես անինքնասեր ձևով ապրել»,-ասաց նա:

Դիտարկմանը, թե իշխանավորները նշում են, որ իրենք հենց ժողովրդի կողմից են ընտրվել, պատգամավորը նկատեց, որ բնակչության մասնակցությունը ընտրություններին հիսուն տոկոսից պակաս է եղել, որից 70 տոկոսն է իրենց ձայն տվել:

«Իսկ հիմա տեսեք, թե իրենց ձայն տվածներից ովքեր են իրենց հավատում, այսօր ոչ մի ներդրում Հայաստանում չի արվում, գործարար հատվածը համարյա թե պարապուրդի մեջ է, միջին բիզնեսի ներկայացուցիչները մտադիր են այսօր Հայաստանը լքել, պարզապես սահմանները փակ են: Եթե սահմանները բացվեցին, մեծ արտագաղթ է սպասվում, դրա մասին թող իրենք մտածեն, ես լրջանալու կոչ եմ անում»,-ասաց նա և հարց բարարձացրեց, թե ինչու Նիկոլ Փաշինյանը արագաչափերը, կարմիր գծերը չի վերացնում:

«Ինքը շատ լավ էլ տեղավորվել է գործող Սահմանադրության շրջանակներում, շատ լավ է զգում իրեն՝ որպես «սուպեր» վարչապետ»,-ասաց նա:

Ինչ վերաեբերում է հարցինն, թե որն է ԲՀԿ-ի՝  իշխանափոխության հասնելու ռազմավարությունը, նա ասաց, որ ամեն ինչ արվելու է օրենքով, պարզապես հիմա խորհրդակցություններ են գնում, ժողովրդի հետ քննարկումներ են գնում:

«Ամեն ինչ կլինի ժամանակին, որևէ հետադարձ չկա։ Իշխանափոխության հասնելու ճանապարհը վարչապետի հրաժարականն է և օրենքով թույլատրված միջոցներով հասնելու ենք, ինքը պետք է հասկանա, որ անելիք չունի բացի նկարվելուց, սելֆի անելուց, մարդկանց պատերին ծեփելուց ուրիշ ոչնչով զբաղված չէ: 

Մոտ է ժամանակը, որ Նիկոլ Փաշինյանը հասկանա, որ ժողովուրդը իրեն չի ընդունում»,-ասաց նա և նշեց, որ իշխանության նպատակը Ծառուկյանի հետևից ընկնելն է, բայց նրանք չեն հասնելու իրենց ուզածին:

Անդրադառնալով մյուս ուժերի հետ համագործակցությանը, Գևորգ Պետրոսյանն ասաց, որ համագործակցության եզերեր եղել են և եթե նոր առիթներ կլինեն համագործակցության, ապա հանրությանը դրա մասին կտեղեկացնեն: «Մենք գործում ենք հրապարակային, ոչ մի քննարկում գաղտնի չենք պահում, եթե նոր քաղաքական որոշումներ կայացնենք, կտեղեկանաք»,-ասաց նա:

Աղբյուր՝ Tert․am