Աննա Հակոբյանի՝ զինվորական հագուստով ֆոտոսեսիան ավելի շատ թատերական բեմադրություն է և արժեզրկում է զինվորականի կերպարը. Միհրդատ Մադաթյան
Եթե նայենք նախկինում Աննա Հակոբյանի խաղաղության կոչերին, Արցախում Մեհրիբան Ալիևայի մուղամ լսելու հրավերին, ապա երեկվա ֆոտոսեսիան՝ զինվորական հագուստով, ավելի շատ թատերական բեմադրություն է, քան որևէ այլ բան, չեմ հասկանում այդ ամենի միտումը. Tert.am-ի հետ զրույցում ասաց քաղաքական հոգեբան Միհրդատ Մադաթյանը՝ անդրադառնալով ՀՀ վարչապետի տիկին Աննա Հակոբյանի լուսանկարներին, որոնք արվել էին մարտական և կրակային պատրաստության մեկշաբաթյա դասընթացի շրջանակում։
Հոգեբանի կարծիքով՝ Աննա Հակոբյանի զինվորական հագուստով ներկայանալը համացանցում միանշանակ չի ընդունվել հանրության շրջանում, քանի որ բնական չէր, ինչը նաև նկատելի էր համացանցում արվող մեկնաբանություններից:
«Զինվորներին արժեզրկելուց հետո նոր հերոսներ են սկսում ձևավորվել, որոնք այնքան էլ արժեքավոր չեն, տվյալ դեպքում Աննա Հակոբյանին, որպես հերոս ընկալելը դժվար կլինի, բայց ինչ -որ չափի զինվորական կերպարի արժեզրկում տեղի ունեցավ»,– ասաց նա:
«Աննա Հակոբյանը տավուշյան դեպքերի ժամանակ փոխանակ զինվորներին խրախուսեր դեպի մարտական ուղի, հակառակը արեց: Նա ժամանակին ասել է, որ պատերազմի ժամանակ անտեղի երիտասարդներ են զոհվում, «Կանայք հանուն խաղաղության» արշավ է իրականացնում՝ ընդդեմ պատերազմի և այդ կերպարի ամբողջականության համար այս կերպարը բոլորովին չի համընկնում նրա նախկինում արված կոչի կամ վարքագծի հետ»,- ասաց նա:
Միհրդատ Մադաթյանի խոսքով՝ վերջին շրջանում Աննա Հակոբյանի հաճախակի զինվորական հագուստներով ներկայանալը արվում է իմիջ ձևավորելու համար, ինչը, նրա կարծիքով, հանրության կողմից չի ընդունվում։
«Սա պոպուլիստական շարժում է՝ սուրճ դնելուց նկարներ է հրապարակվում, հասարակ թվալու կերպար է ուզում ստեղծել, ուղղակի իմիջի ձևավորումը պետք է ի սկզբանե ստեղծվեր: Երբ զինվորական հագուստ է հագնում Սեյրան Օհանյանը, Կոմանդոսը, ազատամարտիկ Գևորգ Գևորգյանը, ապա դա նորմալ է, նրանք այդ հագուստը կրելու իրավունքն ունեն, քանի որ իրենց կյանքով ձեռք են բերել: Բայց Աննա Հակոբյանի ամուսինը ժամանակին չի ծառայել, Ապրիլյան պատերազմին և միայն մայիսի վերջին մեկ-երկու խրամատ է փորել, և այս դեպքում իր կնոջ զինվորական համազգեստով կերպարը անհասկանալի և զավեշտալի է»:
Հետևեք մեզ Facebook-ում