ՀՀ ԱԳՆ. Հուլիսյան մարտերը հարվածեցին Ադրբեջանի դիվանագիտական ներուժին
Վերջին շրջանում ադրբեջանական կողմից հակասական մեսեջներ եւ հայտարարություններ են հնչում: Կարելի է ենթադրել, որ հուլիսյան մարտերը հարվածեցին ոչ միայն Ադրբեջանի ԶՈՒ-ին, այլ նաեւ` դիվանագիտական ներուժին: Այս մասին սեպտեմբերի 2-ին լրագրողների հետ հանդիպման ժամանակ ասաց ՀՀ արտաքին գործերի նախարարության մամուլի քարտուղար Աննա Նաղդալյանը:
Մեկնաբանելով Բաքվի վրդովված հայտարարությունները Ռուսաստանի կողմից Հայաստանին զենք մատակարարելու կապակցությամբ` Աննա Նաղդալյանը նշեց, որ որքան էլ Ադրբեջանի դիվանագիտական ներուժի դեգրադացիան շարունակվի, հայկական կողմը մտադիր չէ իջնել նրանց մակարդակին: ««Հայտնագործություն» անեմ` հայ-ռուսական դաշնակցային հարաբերությունները հաստատվել են 1990-ականներին, եւ զարմանալի է, որ Ադրբեջանը միայն այսօր է բացահայտել այդ աշխարհաքաղաքական իրողությունը»,- ասաց մամուլի քարտուղարը:
Պատասխանելով Հայաստանի եւ Ադրբեջանի արտգործնախարարների հանդիպման հնարավորության մասին հարցին` Նաղդալյանը հիշեցրեց ՀՀ արտաքին գործերի նախարար Զոհրաբ Մնացականյանի` «Ինտերֆաքս»-ին տված հարցազրույցում խաղաղ գործընթացի շրջանակներում աշխատանքը շարունակելու պատրաստակամության մասին հայտարարությունը: Հայաստանը նաեւ ի գիտություն է ընդունեկ Ադրբեջանի արտգործնախարարի` Մոսկվա կատարած այցի ժամանակ արած հայտարարությունը: Սակայն ժամկետների առումով ՀՀ ԱԳՆ ներկայացուցիչը հրաժարվեց որեւէ տեղեկություն հաղորդել:
Մամուլի քարտուղարը վերահաստատեց, որ հայկական կողմի համար առաջնահերթություններից մեկը հրադադարի ռեժիմի ամրապնդումն է, ինչը ԵԱՀԿ գործող նախագահի անձնական ներկայացուցչի թիմի ընդլայնում եւ միջադեպերի հետաքննության մեխանիզմի ներդրում է ենթադրում: «Ադրբեջանը կա՛մ ուղղակիորեն մերժում է, կա՛մ այնպիսի պայմանները է առաջ է քաշում, որ զրոյացնում է բոլոր ջանքերը: Բայց հարցը օրակարգում է»,- նշեց Աննա Նաղդալյանը:
Պատասխանելով փուլային լուծում առաջարկող փաստաթղթի առկայության մասին Ռուսաստանի արտգործնախարար Սերգեյ Լավրովի հայտարարության մասին հարցին` Նաղդալյանը հիշեցրեց, որ ի պատասխան դրան հնչեցվել է ՀՀ ԱԳ նախարարի մեկնաբանությունը, որում նա հայտարարել է տարբերակի անհնարինության մասին, որի դեպքում անվտանգության եւ ինքնորոշման գերակայությունը հետին պլան է մղվում: «Հուլիսից հետո մեր ջանքերն ուղղված են բանակցային գործընթացի վերականգնմանը: Մեր առաջնահերթություններն Արցախի անվտանգության ապահովումն ու առանց սահմանափակումների ինքնորոշման իրավունքի իրացումն են»,- ընդգծեց Աննա Նաղդալյանը:
Հետևեք մեզ Facebook-ում