Լավրովը քննադատել է Նավալնու հետ կատարվածը քննելու Արևմուտքի պահանջը. Տեսանյութ

Արևմտյան երկրների պահանջը Ռուսաստանին քննել ռուսաստանցի ընդդիմադիր գործիչ Ալեքսեյ Նավալնիի հետ տեղի ունեցածը անհիմն է, հայտարարել է ՌԴ արտգործնախարար Սերգեյ Լավրովը: Հաղորդում է Interfax.ru-ն:

«Այժմ մեզ պահանջներ են առաջադրում, որպեսզի Օմսկի բժիշկները անհապաղ ներկայացնեն իրենց եզրակացությունները (Նավալնու հնարավոր թունավորման վերաբերյալ), որպեսզի մենք քննություն անցկացնենք այն բանի վերաբերյալ, որ Նավալնին ընկել է կոմայի մեջ», - ասաց նախարարը երեքշաբթի ելույթ ունենալով Մոսկվայի Միջազգային հարաբերությունների պետական համալսարանում (МГИМО) ուսանողների հետ հանդիպմանը:

Նախարարի խոսքերով, Նավալնին «Օմսկում մեկ օրից քիչ ավելի է անցկացրել, և մեր բոլոր արևմտյան գործընկերներն արդեն աղմուկ են բարձրացրել, ինչու որևէ տեղեկություն չկա»: 

«Ահա, նա վերջապես արդեն մեկ շաբաթ է ինչ գտնվում է Գերմանիայում: Գերմանացի բժիշկները նույնպես որևէ տեղեկություն չեն տալիս: Բայց նրանց չգիտես թե ինչու ոչ մեկ պահանջներ չի ներկայացնում», - նշեց Լավրովը:

Ինչպես ընդգծեց Լավրովը, «մեզ մեղադրում են, որ մենք չենք քննում այդ պատահարը»:

«Դա սուտ է: Սկսած այն օրվանից, երբ դա տեղի ունեցավ, մեր ներքին գործերի նախարարությունը նախաքննական ստուգում է իրականացրել, իսկ քննությունը կարող է սկսվել, երբ հաստատվի, թե ինչ է կատարվել», - ասաց նա:

Նա հիշեցրեց, որ գերմանացի բժիշկները «դեռ չեն կարող մեզ համապատասխան տեղեկատվություն տրամադրել», չնայած ՌԴ Գլխավոր դատախազությունը դիմել է Գերմանիային խնդրանքով փոխադարձ իրավական օգնություն տրամադրել:

Zham.am