Արթուր Դավթյանը հաղորդում է ներկայացրել դատավորի դեմ
Արմավիրի մարզի ընդհանուր իրավասության դատարանի դատավոր Վահե Խալաթյանի դեմ կարգապահական վարույթ է հարուցվել։ Դրա համար հիմք է հանդիսացել Գլխավոր դատախազ Արթուր Դավթյանի կողմից արդարադատության նախարար Ռուստամ Բադասյանին ներկայացրած հաղորդումը։
Վերջինս էլ միջնորդություն է ներկայացրել Բարձրագույն դատական խորհրդին դատավորին պատասխանատվության ենթարկելու վերաբերյալ։
Արդարադատության նախարարությունից փորձեցինք ճշտել, թե ի վերջո ո՞րն է կարգապահական վարույթ հարուցելու հիմքը, պատասխանեցին․ «Դատական օրենսգիրքը կարգապահական վարույթների թեմայով գաղտնիության պահանջ ունի․ որևէ կարգապահական վարույթի վերաբերյալ մանրամասներ ներկայացնելու իրավունք չունենք։ Ինչ հրապարակման ենթակա է, ներկայացված է ԲԴԽ-ի կայքում»։
Նշենք, որ Խալաթյանը մի քանի աղմկահարույց գործեր է քննել, մասնավորապես՝ այժմ քննում է Արմավիրի մարզպետի խորհրդականի սպանության գործը։ Դատավորը մամուլում աչքի ընկավ մի բացառիկ քրեական գործի որոշումով, երբ սոցիալապես անապահով ամբաստանյալի համար որպես պատիժ թե պաշտպանը, թե մեղադրող դատախազը միջնորդել էին պատիժ նշանակելիս կիրառել նաև Քրեական օրենսգրքի 70-րդ հոդվածը՝ պայմանականորեն այն չկիրառելու պայմանով, սակայն դատարանը, դատավոր Վահե Խալաթյանի նախագահությամբ, ամբաստանյալին դատապարտել էր չորս տարվա ազատազրկման. առանց ծնողական խնամքի էին մնացել նրա չորս երեխաները:
Հետևեք մեզ Facebook-ում