«Ե՛կ մտածենք»․ «Հայրենիք» հիմնադրամի աջակցությամբ Գյումրիում տեղի ունեցավ ներառական ինտելեկտուալ խաղ
Օգոստոսի 30-ին «Հայրենիք»-ի Գյումրու գրասենյակում հաշմանդամություն ունեցող անձինք մրցում էին իրենց ինտելեկտով։ «Ե՛կ մտածենք» ինտելեկտուալ խաղը կազմակերպել էր «Մարզամշակութային ներառական կենտրոն» ՀԿ-ն՝ «Հայրենիք» զարգացման հիմնադրամի աջակցությամբ։
«Արդեն յոթերորդ անգամ անցկացվող խաղի նպատակն է հաշմանդամություն ունեցողների համար ստեղծել հավասար պայմաններ, հնարավորություն ընձեռել՝ ձեռք բերելու նոր ծանոթներ ու ընկերներ, այսինքն՝ ինտեգրել հասարակությանը»,-ասաց «Մարզամշակութային ներառական կենտրոն» ՀԿ-ի նախագահ Արտյոմ Դիլանյանը։
Գիտելիքի օրվան ընդառաջ կազմակերպված խաղին մասնակցում էին Գյումրիի, Վանաձորի ու Երևանի թիմերը՝ յուրաքանչյուրում 6 անձ։
«Մեր հասարակության բոլոր անդամների լիարժեք ինտեգրումն ու ինտելեկտուալ զարգացումը Հիմնադրամի ռազմավարական առաջնահերթություններից է»,-ողջունելով մասնակիցներին՝ ասաց «Հայրենիք» հիմնադրամի տնօրեն Խաչիկ Գալստյանը։
Հաշմանդամություն ունեցող կամ սոցիալական վատ վիճակում գտնվող անձանց կյանքը փոխել ձգտող կազմակերպությունն արդեն 10 տարի բազմատեսակ նախագծեր է իրականացնում։ Առաջիկայում պատրաստվում են խեցեգործական ձեռնարկություն հիմնել, որտեղ կաշխատի հաշմանդամություն ունեցող մեկ տասնյակից ավելի անձ։
Արտյոմ Դիլանյանն ասում է՝ իրենց համար կարևոր է կազմակերպության շահառուների ավելի լայն շրջանակի ներգրավումը։ «Մտածում ենք «Ե՛կ մտածենք» ինտելեկտուալ խաղն առաջիկայում անցկացնել «Հայաստան, Արցախ, Սփյուռք» ձևաչափով»,-ասաց նա՝ ուրախությամբ նշելով, որ «Հայրենիք»-ի պես գործընկերն իրենց ավելի ամուր է դարձնում։
Հետևեք մեզ Facebook-ում