Ապրիլյան գործողություններն ավարտվել են որոշ տարածքային կորուստներով, բայց ռազմաքաղաքական փոփոխություն չի կատարվել. Տեսանյութ
Իրականացվում է ծառայողական քննություն մոտակա ժամանակ քրեական գործ կհարուցվի: Ծառայողական քննության արդյունքում կհասկանանք ինչպես է դա տեղի ունեցել, մեր նախնական գնահատականն այն է, որ մեր զինծառայողը մոլորվել է և հայտնվել է հակառակորդի կողմում. լրագրողների հետ ճեպազրույցի ժամանակ ասաց ՀՀ պաշտպանության նախարար Դավիթ Տոնոյանը` խոսելով Ադրբեջանում հայտնված սպա Գուրգեն Ալավերդյանի մասին:
Նախարարի խոսքով`պետք է պարզվի զինծառայողը առևանգվե՞լ է, թե այլ պայմաններ են եղել: Ըստ նրա՝ հայկական կողմի պահանջն է, որ միջազգային Կարմիր խաչի ներկայացուցչությունը Ադրբեջանում այցելի զինծառայողին, որը դեռևս չի կատարվել:
«Մենք վստահ ենք, որ և ԵԱՀԿ-ի շրջանակներում, միջազգային Կարմիր խաչի գրասենյակի շրջանակում և ՄԱԿ-ի կառույցները համապատասխան կառույցները ջանք ու եռանդ չեն խնայում, որ ամեն ինչը կատարվի և նա վերադարձվի, սակայն կան վերադարձման պայմաններ, գործընթաց, որի մասին այս պահին խոսել չենք կարող»,-ասաց Դավիթ Տոնոյանը:
Հարցին, թե Ապրիլյան պատերազմի շուրջ դիսկուրս է ձևավորվել, պնդում են, որ Ապրիլյան պատերազմում հաղթանակ չենք գրանցել, իսկ երրորդ նախագահ Սերժ Սարգսյանը ասել է, որ Ապրիլյան պատերազմում հաղթանակ ենք տարել, Դուք այդ ժամանակահատվածում փոխնախարար եք եղել, մենք, ի վերջո, ապրիլյան պատերազմում հաղթե՞լ ենք, թե ոչ, Դավիթ Տոնոյանը պատասխանեց.
«Դուք ինձնից քաղաքական գնահատական եք ուզում, Ապրիլյան գործողություններն ավարտվել են որոշ տարածքային կորուստներով, բայց ռազմաքաղաքական փոփոխություն չի կատարվել: Որպես պաշտպանության նախարար հաղթելու կողմնակիցն եմ»:
Դիտարկմանը, թե նշել էիք, որ այդ ժամանակահատվածում հետախուզական տվյալների խնդիր չենք ունեցել, հիմա խոսվում է, որ թերացումներ եղել են, արդյո՞ք դրանք բավարար են, որ քրեական գործ հարուցվի, պաշտպանության նախարարը նշեց, որ Ապրիլյան հանձնաժողովը, հանգամանքները պարզելու մեծ աշխատանք է կատարել, երբ ավարտի իր աշխատանքը այն ժամանակ հարցերին կպատասխանի. մի գուցե ինչ-որ բաների հետ համաձայն լինի կամ իր անհամաձայնությունը հայտնի:
Լրագրողը հետաքրքրվեց, իսկ Պաշտպանության նախարարության ուսումնասիրությունից էական տարբերություն կարո՞ղ է լինել, քանի որ Ապրիլյան պատերազմից հետո Պաշտպանության նախարարությունը այդպիսի փաստաթուղթ ուներ,Դավիթ Տոնոյանը նշեց.
«Այդ վերլուծությունը շատ մանրամասն է եղել, որը շատ հարցերի պատասխաններ տվել է, ընդորում, եղել է մեծ ինքնաքննադատություն, ես կարծում եմ, որ շատ տարբերություն չի լինելու: Ուղղակի ինքնաքննադատությունը հնարավոր է որոշակի հրապարակային դառնալ, որոշակի`ոչ»:
Լրագրողը, պաշտպանության նախարարից հետաքրքրվեց՝ երկու տասնյակից ավելի դիրքերի կորստի մասին է խոսվում, արդյո՞ք դրանք ռազմավարական նշանակություն ունեցել դիրքեր են եղել, նախարարը նշեց.
«Ես դիրքերի քանակը չեմ հաշվարկել և մի տարեք այդ դաշտ, բոլոր դիրքերը ռազմավարական նշանակություն ունեն, դիրքերը լուծում են մարտավարական խնդիր, քանի որ մեկ վաշտի, մեկ դասակի դիրքեր են»:
Մանրամասները՝ տեսանյութում:
Zham.am
Հետևեք մեզ Facebook-ում