«Սորոսը» տասը օր անց կրկին հիշեցնում է Փաշինյանին, որ ընտրության ժամը անվերջ չի կարող տևել

Այսօր «Սորոսի» հիմնադրամը Դանիել Իոննիսյանի միջոցով կրկին հիշեցնում է Նիկոլ Փաշինյանին, որ Ալեն Սիմոնյանի մասով խնդիրը պետք է լուծել: Մասնավորապես  Դանիել Իոննիսյանի  ֆեյսբուքյան գրառման մեջ նշված է բառացի հետևյալը. «Ալեն Սիմոնյանը շաբաթներ առաջ ԱԺ փոխխոսնակին, մեղմ ասած, ոչ վայել արտահայտություն է արել՝ խախտելով էթիկայի բոլոր կանոնները:

Նշվածի վերաբերյալ Լարիսա Մինասյանը դիմում է ուղարկել Արարատ Միրզոյանին՝ խնդրելով ստեղծել էթիկայի հանձնաժողով (Սիմոնյանի արարքին գնահատական տալու համար):

Անցել է ավելի քան 10 օր, բայց Ազգային ժողովից խաբար չկա... Ինչու՞.

1. Արարատ Միրզոյանը կիսում է Ալեն Սիմոնյանի կարծիքը ու համարում, որ օրենսդիր մարմնի պաշտոնյան կարող է իրեն այդպես պահել:

2. Արարատ Միրզոյանը ամեն կերպ պաշտպանելու է իր կուսակից Ալեն Սիմոնյանին՝ անկախ վերջինիս ճիշտ/սխալ լինելուց:

3. Արարատ Միրզոյանը վախենում է բացահայտ դուրս գալ Ալեն Սիմոնյանի դեմ:

4. Առաջարկեք ձեր տարբերակը:

Հ.Գ. Մի տեսակ «ու՞մ շունն է» արտահայտությունը էս իշխանության վրա չի գալիս:»:

Ուշադրություն  կարելի է դարձնել, որ Դանիել Իոննիսյանի կոչը ուղղված էր, ոչ թե Նիկոլ Փաշինյանին, այլ ԱԺ նախագահ Արարատ Միրզոյանին: Նպատակը նույնպես հասկանալի է: Ֆորմալ տեսակետից իհարկե  որոշումը պետք է կայացնի Արարատ Միրզոյանը, սակայն բոլորի համար էլ պարզ է, որ իրական որոշողը լինելու է Նիկոլ Փաշինյանը: Եվ ահա, «Սորոսը» Իոննիսյանի շուրթերով, թեև դիմում է Արարատ Միրզոյանին, սակայն նրա իրական հասցեատերը հենց Նիկոլ Փաշինյանն է: Պարզապես «Սորոսն» ուզում է դեռ չխզել իր կապերը իշխանության հետ`  հույս ունենալով, որ ժամանակի ընթացքում «հետ դարձի» կբերի Փաշինյանին: Մանավանդ, որ Փաշինյանի հետ կոալիցիան խզելուց հետո «Սորոսը» որևէ լուրջ այլընտրանք չի ունենա, քան հայտնվել  իր այն իրավիճակում, ինչ եղել էր նախկին իշխանության ժամանակ: Սակայն, եթե գործընթացները ընթանան սորոսականների համար ոչ դրական հունով, նրանք ստիպված կլինեն լքել իշխանությունը և հայտնվել կոշտ ընդդիմադիր դիրքերում: Սակայն մեծ հաշվով նրանց այդ որոշումը կայացվելու է ոչ թե Հայաստանում, այլ երկրից դուրս:

Սա է իրականությունը:

Արտակ Հակոբյան