ՌԴ-ն մեր ռազմավարական դաշնակիցն է, և այդ հայտարարությունը նշանակում է ուղղակի մեղադրել քո դաշնակցին դավաճանության մեջ, դա անթույլատրելի է. Ս. Սարգսյանը՝ Ն. Փաշինյանի հայտարարության մասին

Երբ մարդիկ չստուգված վարկաբեկող, մտքեր ու տեսակետներ են հայտնում դաշնակիցների վերաբերյալ, դա ունենում է շատ խորը հետևանքներ՝ ոչ միայն այդ պահին. այսօր հրավիրված մամուլի ասուլիսի ժամանակ ասաց ՀՀ երրորդ նախագահ Սերժ Սարգսյանը՝ անդրադառնալով լրագրողի հարցին, թե վարչապետ Նիկոլ Փաշինյանը նշել է, որ Ռուսաստանի Դաշնության իմացությամբ և թույլտվությամբ Ապրիլյան պատերազմը տեղի ունենալու վերաբերյալ մտահոգությունների մասին քննարկում է ունեցել ՌԴ գործընկերների հետ:

«Ռուսաստանի Դաշնությունը մեր ռազմավարական դաշնակիցն է, և այդպիսի հայտարարությունը նշանակում է ուղղակի մեղադրել քո դաշնակցին դավաճանության մեջ, դա անթույլատրելի է, հատկապես այն պարագայում, երբ ՌԴ-ն մեզ հսկայական օժանդակություն է ցուցաբերել, որպես դաշնակից»,- ընդգծեց նա, փոխանցում է Tert.am-ը։ 

Երրորդ նախագահի կարծիքով՝ այդպիսի հայտարարությունները քաղաքական տեսակետից տգիտություն են, և ինքը մեծ հաճույքով ցանկանում է լսել, թե ի՞նչ պատասխաններ և ի՞նչ քննարկումներ են եղել ՌԴ-ի գործընկերների հետ:

Սերժ Սարգսյանը նշեց, որ 2010 թվականին ՌԴ-ի այն ժամանակվա նախագահ Դմիտրի Մեդվեդևի Հայաստան այցի ժամանակի փաստաթուղթ, լրացուցիչ արձանագրություն ստորագրվեց, որով ՌԴ ռազմական բազան լրացուցիչ պարտականություններ ստանձնեց: Նրա փոխանցմամբ` մինչև այդ ՌԴ ռազմական բազան պատասխանում էր ԱՊՀ արտաքին սահմանների համար, իսկ 2010 թվականի ստորագրած պայմանագրով իր վրա պատասխանատվություն վերցրեց նաև ՀՀ-ի ողջ սահմանի երկայնքի համար, ինչպես նաև պատասխանատվություն վերցրեց օժանդակելու և թարմացնելու մեր սպառազինությունը:

«Մենք մինչև 2018 թվականի ապրիլյան իրադարձությունները ստացել ենք 50 հազար տոննայից ավել ռազմատեխնիկական օժանդակություն, երբ խոսքը գնում է ռազմատեխնիկական օժանդակության մասին, նշանակում է՝ դրա համար չես վճարում, պատկերացնո՞ւմ եք ինչ թիվ է 50 հազար տոննայից ավելին, այդ թվի մեջ չի մտնում «Իսկանդեր»-ը, 200 մլն, 100 մլն դոլարի պայմանագրով նախատեսված սպառազինությունները և այս պարագաներում խոսել նրա մասին, թե ՌԴ-ի գիտությամբ և հրահրմամբ է տեղի ունեցել Ապրիլյան պատերազմը, կարծում եմ՝ պարզապես սխալի արդյունք էր, չի կարելի նման հայտարարություններ անել»:

ՀՀ երրորդ նախագահը նշեց, որ այն հանգամանքը, որ որևէ երկիր «Իսկանդեր» չունի, խոսում է Ռուսաստանի մեզ դաշնակից պետություն լինելու մասին:

«Բելառուսը, որի հետ Ռուսաստանն ունի ընդհանուր պետության գաղափար, պայմանագիր չունի այդ զինատեսակից, ունի միայն Հայաստանը: Եվ «Իսկանդեր»-ի առկայությունն է, որ 2016 թվականի ապրիլի լայնամասշտաբ, խոշորածավալ պատերազմ չեղավ, այլ եղան լայնամասշտաբ ռազմական գործողություններ: Ձեզ համար տարօրինակ չէ՞, որ ադրբեջանցիներն այդ լայնածավալ ռազմական գործողություններն սկսեցին իրենց հատուկ ստորաբաժանումների ուժերով, նրանց հրետանին հասանելի էր, մեր մի քանի զինավանների մշտական տեղակայման վայրերին, ինչու չօգտագործեցին, ակնհայտ է չէ՞ ինչ էր լինելու, պատասխանը լինելու էր շատ ուղիղ՝ «Իսկանդեր»-ի հրթիռները հասնելու էին Բաքու կամ Գյանջա»,- ընդգծեց նա:

Սերժ Սարգսյանը նշեց, որ Ապրիլյան պատերազմի ժամանակ ադրբեջանցիներն չօգտագործեցին ռազմական ինքնաթիռներ, որովհետև ինքնաթիռները, երբ փորձում էին մոտենալ սահմանին այդ ինքնաթիռները գտնվում էին «Ս-300»-ի թիրախում, որը մենք ՌԴ-ից ստացել ենք, որպես ռազմատեխնիկական օժանդակություն:

«Միգուցե այդպիսի հարցադրման պատճառը եղել է այն, որ ռազմական գործողությունները տևեցին, մինչև ապրիլի 5-ը, և շատերը կարծում էին, որ առաջին օրից պետք է Ռուսաստանի կողմից դադարեցվեին այդ գործողությունները: Իսկ դուք վստա՞հ եք, որ Ռուսաստանը կարող էր մի զանգով ասել՝ ավարտեք այդ պատմությունը: Հո Ադրբեջանը Ռուսաստանի ենթական չէ՞: Այո, Ռուսաստանը ունի բավական քաղաքական հնարավորություն ինչ-որ բան պարտադրելու և ասելու, իսկ ի՞նչ եք կարծում միգուցե այդ ռազմական գործողություները տևեցին 4 օր, որովհետև ադրբեջանցիները համոզվեն, որ իրենք ի վիճակի չեն ռազմական ճանապարհով ԼՂ-ի խնդիրը լուծելու»:

Աղբյուր՝ Tert.am