Ռոբերտ Քոչարյանի գրառումը հավանելու համար ոստիկանը կադրերի ռեզերվ է ուղարկվել նախկին ոստիկանապետ Արման Սարգսյանի հրամանով

Վերջերս ոստիկանության ավագ լեյտենանտ Հայկ Սարգսյանը Ֆեյսբուքի իր էջում գրառում էր արել, որ ՀՀ երկրորոդ նախագահ Ռոբերտ Քոչարյանի գրառումը հավանելու համար ոստիկանության ղեկավարությունն իրեն ուղարկել է կադրերի ռեզերվ:

Tert.am-ն այս առնչությամբ գրավոր հարցում էր ուղարկել ոստիկանություն՝ հարցնելով, թե արդյոք ոստիկանին կադրերի ռեզերվ ուղարկելու պատճառը «լայքն» է, թե այլ պատճառներ կան:

Ի պատասխան հարցման, Ոստիկանության հասարակայնության հետ կապի և լրատվության վարչությունից հայտնել են.«Ոստիկանության ավագ լեյտենանտ Հայկ Հակոբի Սարգսյանը ՀՀ ոստիկանության պետի ժամանակավոր պաշտոնակատարի 15.02.2020 թ. թիվ 413-Ա հրամանով՝ համաձայն՝ «Ոստիկանությունում ծառայության մասին» ՀՀ օրենքի 48-րդ (ոստիկանությանում ծառայողների կադրերի ռեզերվը) հոդվածի, ՀՀ կառավարության 13.12.2002 թ. թիվ 2043-Ն որոշմամբ հաստատված «ՀՀ ոստիկանության կադրերի ռեզերվում գրանցվելու և ռեզերվից հանելու» կարգի 2-րդ կետի «դ» (կադրերի ռեզերվում գրանցվում են ծառայողական անհրաժեշտությամբ պայմանավորված՝ ոստիկանության ծառայողին այլ պաշտոնի փոխադրելիս՝ զբաղեցրած պաշտոնին համարժեք կամ զբաղեցրած պաշտոնից մեկ աստիճան ցածր թափուր պաշտոն չլինելու դեպքում) ենթակետի, ազատվել է զբաղեցրած պաշտոնից և գրանցվել ՀՀ ոստիկանության կադրերի ռեզերվում»։   

Ոստիկանությունից այլ մանրամասն չեն հայտնել, սակայն ըստ թվագրության, ստացվում է, որ Հայկ Սարգսյանին կադրերի ռեզերվ է ուղարկել նախկին ոստիկանապետ Արման Սարգսյանը, ով 2020-ի փետրվարին ոստիկանապետի ժամանակավոր պաշտոնակատարն էր:

Աղբյուր՝ Tert.am