Կառավարությունը պետք է կանգ առնի և գնահատի իր քայլերը, եթե այսպես շարունակենք, որևէ դրական արձանագրում չի լինի. տնտեսագետ

Նախորդ տարվա համեմատ վեց ամսվա կտրվածքով մենք ունենք տնտեսական ակտիվության ցուցանիշի մոտ 5 տոկոս անկում, նախորդ տարվա հունիսի համեմատ՝ 7.5 տոկոս անկում, այսինքն՝ միջին ցուցանիշը մի փոքր ավելի ցածր է, որովհետև մենք այս տարի հունվար-փետրվարին ունեցել ենք տնտեսական աճ: Այս մասին Tert.am-ի հետ զրուցում նշեց ՀՅԴ Բյուրոյի տնտեսական հետազոտությունների գրասենյակի ծրագրերի համակարգող, տնտեսագետ Թադևոս Ավետիսյանը՝ անդրադառնալով 2020 թվականի առաջին կիսամյակի սոցիալ-տնտեսական իրավիճակի վերաբերյալ Վիճակագրական կոմիտեի հրապարակած տվյալներին:

«Այսպես շարունակվելու պայմաններում մենք մինչև տարվա վերջ կունենանք և՛ համախառն ներքին արդյունքի, և՛  տնտեսական ակտիվության ցուցանիշի էական կրճատում, ընդհուպ՝ երկնիշ թվով կրճատում: Բացասական արձանագրում ունենք նաև արտահանման մասով, կրճատվել է նաև ներմուծումը, շինարարությունը, և դա այն դեպքում, երբ ծառայությունների, առևտրի, շինարարության  ոլորտներում տասնյակ հազարավոր աշխատատեղեր են կրճատվել»,- նշեց տնտեսագետը:

Թադևոս Ավետիսյանը նշում է, որ տնտեսական աճի ցածր ցուցանիշի պատճառը համավարակն է, որն իր հետքն է թողել ամբողջ աշխարհում, սակայն կառավարության կողմից մշակված հակաճգնաժամային միջոցառումները ևս արդյունավետ չեն գործել:

«Ի սկզբանե ուշացած էին նաև տնտեսական աջակցման ծրագրերը և համարժեք չէին իրավիճակին, որովհետև միայն արտոնյալ վարկերի միջոցով փորձում էին ծախս չանելով արդյունք ստանալ, որը հարիր է այսօրվա կառավարությանը, որովհետև պոպուլիստական հենքի վրա են կառավարում: Եվ արդյունքում իրականությունը եղավ դաժան՝ այդպիսի ծրագրերը ոչ մի արդյունք չտվեցին: Երբ կիրառում էին սահմանափակող միջոցառումներ, դրանք իրենց բացասական ազդեցությունը թողեցին տնտեսության վրա, մասնավորապես՝ զբոսաշրջության, հանրային սննդի, հանգստի ապահովման ոլորտների վրա և բերեցին դրանց անկման, աշխատատեղերի փակման և չվճարվող պարապուրդների: Ցավոք, համավարակի դեմ պայքարն էլ չունեցավ դրական արդյունք»:

Թադևոս Ավետիսյանը նշեց, որ համավարակի տարածման առաջին օրվանից ՀՅԴ Հայաստանի Գերագույն մարմինն առաջարկներ է ներկայացրել և աջակցելու պատրաստակամություն հայտնել, սակայն դա մնացել է անարձագանք.

«Առաջարկի հիմնական բովանդակությունն այն էր, որ եթե պետությունը սահմանափակում է որևէ ոլորտի գործունեությունը, պետք է կրած վնասների համար համարժեք փոխհատուցում տա: Ճիշտ ժամանակն է, որ գործազրկության նպաստը վերականգնվի, և մարդիկ եթե աշխատանքը կորցրել են ոչ իրենց մեղքով, ապա պետք է նվազագույն կենսապահովման զամբյուղին համարժեք վճարվեն այնքան ժամանակ, մինչև իրենց աշխատանքը վերականգնվի: Չպետք է սպասեն, որ այդ ընտանքիները վերջնականապես դառնան աղքատ, և նոր աղքատության նպաստ տրամադրեն: Այսինքն՝ երկու ուղղությամբ պետք է ռազմավարություն մշակել, մեկը՝ տնտեսվարոներին իրենց կրած կորուստներին համարժեք ոչ թե վարկ, այլ պետական բյուջեից սուբսիդավորում տրվի, և մյուսը՝ աջակցեն աշխատանքը կորցրած անձանց»,- ընդգծեց Ավետիսյանը:

Տնտեսագետը նշում է, որ հակաճգնաժամային կառավարումը պետք է լինի թիրախավորված՝ ըստ առաջնահերթությունների, որպեսզի արդյունքը նկատելի լինի.

«Կարևոր է, որ կառավարությունը կանգ առնի և նախնական գնահատում տա իր քայլերին, ի վերջո նույն նավում ենք, նույն տնտեսությունն է բոլորիս սնում, և բոլորս ապրում ենք մեկ հասարակությունում, եթե այսպես շարունակենք, որևէ դրական արձանագրում չի լինի: Համավարակի կանխարգելման կարևոր բաղադրիչը պատասխանատվությունն է, և այս անպատժելիության մթնոլորտը՝ մենք ենք որոշում, որովհետև ունենք 72 տոկոս քվե, լավ տեղ չի տանի: Պոպուլիզմը և հակաճգնաժամային կառավարումը իրար հետ ոչ միայն համադրելի չեն, այլ իրար հակասող երևույթներ են»,- եզրափակեց Թադևոս Ավետիսյանը: