Մոսկվայում տեղի ունեցած բախումները հայերի եւ ադրբեջանցիների միջեւ պլանավորված գործողություններ էին․ ՀՀ դեսպան
Ուրբաթ երեկոյան Մոսկվայում բախումները հայերի եւ ադրբեջանցիների միջեւ պլանավորված գործողություններ են եղել, «Գովորիտ Մոսկվա» ռադիոկայանին ասել է ՀՀ դեսպան Վարդան Տողանյանը: Դրանք պլանավորվել էին ադրբեջանական կողմից: Ըստ նրա՝ իրենք փորձել են կապվել սփյուռքի ներկայացուցիչների հետ, սակայն չեն կարողացել:
«Մենք այսպիսի տվյալներ ենք ստացել ամբողջ գիշեր․ Մոսկվայի հարավ-արեւելքում մի քանի նման դեպք է եղել: Շատ լավ կազմակերպված ավազակախմբերը, լավ զինված, հարձակվել են, ըստ երևույթին, հայկական համարանիշներով ավտոմեքենաների կամ առանձին անձանց վրա եւ մեծ ծեծկռտուք են սկսել: Զոհեր չկան, տուժածներ կան, մի քանի մարդ գտնվում է հիվանդանոցներում: Մենք մեր գործողությունները համակարգում ենք իրավապահ մարմինների հետ, մեր հասարակական կազմակերպությունները նույնպես կապի մեջ են: Կոչ ենք անում չկորցնել զգոնությունը, չտրվել սադրանքներին, քանի որ սա լավ կազմակերպված հայատյաց քաղաքականություն է, որն արտահանվում է Ադրբեջանից: Դրա նպատակն է ոչնչացնել այն հավասարակշռությունը, որը մենք ունենք Ռուսաստանում: Սա կազմակերպված սադրանք է, որը սկսվեց առեւտրի կետերից: Եթե քայլեր չձեռնարկեք, ապա դա շատ լուրջ հետեւանքներ կունենա: Կա Ռուսաստանի օրենսդրությունը, եւ մեզ համար այժմ կարեւոր է, որպեսզի այն հաղթի բոլոր քաղաքացիների համար»:
Նա կարծում է, որ ակցիային ներգրավված են Ադրբեջանի իշխանությունները: «Կարծում եմ, որ դա, առաջին հերթին, պայմանավորված է նրանով, որ Ադրբեջանի ղեկավարությունն այս բոլոր տարիներին եւ հատկապես վերջին ամիսներին զարգացրել է իր ագրեսիվ հռետորաբանությունը: Վերջին մի քանի ամսվա ընթացքում այն նախապատրաստել է իր բնակչությանը պատերազմին՝ բացատրելով, որ Լեռնային Ղարաբաղի խնդրի միակ հնարավոր լուծումը ռազմական օպերացիան է «ազատագրման» համար: Այդ հռետորաբանությունը նրանք արտահանել են Ռուսաստանի տարածք»:
Դեպքի վայրում ոստիկանությունը 13 մարդ էր ձերբակալել: Այժմ ստուգում է կատարվում։
Հետևեք մեզ Facebook-ում