Ոստիկանությունում ծառայողական քննություն է նշանակվել Հասմիկ Սեդրակյանի՝ ոստիկանների կողմից իրեն ծաղրելու, սեռական բնույթի հայհոյանքներ տալու, հոգեբուժարան տանելու բողոքի վերաբերյալ. Ոստիկանություն

Երեկ Tert.am-ը լուսաբանել էր քաղաքացի Հասմիկ Սեդրակյանի բողոքը, որում նա նշում էր՝ ոստիկանները պարբերաբար նրանից պահանջում են դրսում դիմակ դնել՝ ծածկելով քիթը, սակայն նա թոքերի խնդիր ունի և չի կարող մաքուր օդին մշտապես դիմակ կրել։ Նա նշել էր, որ երբ հերթական անգամ ոստիկանները պահանջել են դիմակ և անձնագիր, նա հրաժարվել է անձնագիրը տրամադրել, ոստիկանները նրան տարել են բաժին:

Tert.am-ը Ոստիկանությունից պարզեց, թե արդյոք ընթացք տրվել է այս հրապարակման վերաբերյալ, ըստ որի՝ ոստիկանները քաղաքացում ծաղրել են, սեռական բնույթի հայհոյանքեր տվել, հոգեբուժարան տարել:

ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանը տեղեկացրեց, որ դեպքի առթիվ Ոստիկանության պետ Վահե Ղազարյանի հանձնարարությամբ նշանակվել է ծառայողական քննություն:

«Այնքան սթրեսի մեջ են գցել, որ ես իմ անձնագիրը պատռել եմ: Գնացինք բաժին, տեսնում եմ ոստիկանները առանց դիմակ, փորձեցի նկարել, ոստիկանը այդ պահին քիթը դիմակով փակեց, իմ հեռախոսը վերցրեցին, անջատեցին և հինգ ժամ հետո տվեցին հոգեբուժարանում»,-ասել էր նա՝ հավելելով, որ բաժնում նրան ծաղրել են, ծիծաղել, սեռական բնույթի վիրավորանք են տվել: Նա նշել էր, որ մոտ հինգ ժամ ձեռնաշղթաներով պահել են, հետո մեքենայով տարել են հոգեբուժարան:Ըստ նրա՝ ոստիկանները ևս դիմակ չեն կրել: 

Tert.am