Վրաստանը հերքում է ադրբեջանցիների պնդումը, թե իբրև իր տարածքով Հայաստան զենք է տեղափոխվել

Երեկ Վրաստանի ԱԳՆ-ն պաշտոնական հայտարարությամբ է հանդես եկել, որտեղ հերքել է ադրբեջանական  Haqqin.az-ի այն պնդումը, թե իբր վերջին հայ-ադրբեջանական բախումների ժամանակ հայկական զենքը  բերվել էր Հայաստան Վրաստանի տարածքով:

Վրաստանի ԱԳՆ-ն իր հայտարարությամբ նշել էր, որ «Պետական մի մարմնից ստացած այդ կեղծ լուրի տարածումը նպատակ է հետապնդում ստվերելու վրաց-ադրբեջանական համագործակցությունը». ասված էր հայտարարության մեջ:

Ըստ այդ երկրի ԱԳՆ-ի` «...ադրբեջանական այս պարբերականը նպատակ է հետապնդում արհեստական խնդիրներ ստեցծել երկու երկրների հարաբերությունների մեջ...»:

Նշենք,  որ վրացական կողմի այսպիսի կոշտ արձագանքը, հավանաբար, պայմանավորված էր այն հանգամանքով, որ երկու օր առաջ Ադրբեջանի ԱԳՆ-ն իր մոտ էր հրավիրել Սերբիայի դեսպանին և բացատրություն էր պահանջել` իբրև Հայաստանին զենք և զինամթերք վաճառելու վերաբերյալ: Կարծես Սերբիան զենք վաճառելու համար հատուկ պետք է Ադրբեջանից «իրավունք» ստանար այդ քայլի համար:

Եվ ահա` զգալով, որ ադրբեջանցիների հաջորդ քայլը լինելու էր Ադրբեջանում Վրաստանի դեսպանի հրավիրումը այդ երկրի ԱԳՆ, վրացական կողմը որոշեց առաջին քայլն անել` մեղադրելով ադրբեջանական պարբերականին «արհեստական խնդիրներ ստեղծելու մեջ երկու երկրների միջև»:

Ինչպիսին կլինի ադրբեջանցիների արձագանքը, ցույց կտա մոտ ապագան: Մեկ բան ակնհայտ է, որ հուլիսյան բախումներից հետո Իլհամ Ալիևը որոշել է կոշտացնել իր արտաքին քաղաքական ուղեգիծը, բայց ինչքանով նրան կհաջողվի արդյունքներ ստանալ դիվանագիտական ճակատում, խիստ կասկածելի հեռանկար է: Մանավանդ, որ այս օրերին տեսանելի է ադրբեջանցիների պահվածքում խիստ էմոցիոնալ կոմպոնենտը: Դա միգուցե հասկանալի է այս օրերի համար, սակայն հեռանկարի առումով կարող է ադրբեջանցիների համար խաղալ ավելի շատ բացասական, այլ ոչ թե դրական դեր:

Սա է իրականությունը:

Արտակ Հակոբկան