Ավիգդոր Էսկին. Իլհամ Ալիևի ռեժիմը շուտով կավարտվի. Տեսանյութ

Իսրայելցի հասարակական գործիչ և հրապարակախոս Ավիգդոր Էսկինը, մեկնաբանելով հայ-ադրբեջանական սահմանում իրավիճակի սրումը, նշեց, որ ներկայիս իրավիճակի առանձնահատկությունն այն է, որ բախումները տեղի են ունենում ոչ թե Ղարաբաղում, այլ հենց Հայաստանի և Ադրբեջանի սահմանին:

Միևնույն ժամանակ, նա նշել է, որ Բաքվում բազմահազար հանրահավաքը, որի ընթացքում քաղաքացիները ներխուժել էին խորհրդարանի շենք, ապացուցեց, որ Իլհամ Ալիևի ռեժիմը շուտով կավարտվի:

Էսկինը նաև նշել է, որ Իսրայելի համար վտանգավոր է Թուրքիայի և Ադրբեջանի ամրապնդումը ՝ Հայաստանի և Արցախի տարածքային ամբողջականության հաշվին:

Հիշեցնենք, որ հուլիսի 12-ին՝ ժամը 12:30-ի սահմաններում, Ադրբեջանի զինված ուժերի զինծառայողները, անհասկանալի պատճառով, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք:

Հուլիսի 12-ին՝ ժամը 13:45-ին, Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել են հայկական կողմից և կորուստներ կրելով` հետ շպրտվել:

Ադրբեջանական կողմը հրետակոծությունը շարունակել է նաև հուլիսի 13-ին և 14-ին։ Հուլիսի 15-ին սահմանին իրադրությունը համեմատաբար հանգիստ է եղել։

Ըստ վերջին տվյալների՝ ադրբեջանական կողմը պաշտոնապես հաստատված 12 զոհ ունի, հայկական կողմը՝ 4: Կան վիրավորներ:

Լույս հուլիսի 16-ին՝ ժամը 03:40-ի սահմանում, Ադրբեջանի զինուժը ձեռնարկել է դիվերսիայի փորձ: ՀՀ ՊՆ մամուլի խոսնակ Շուշան Ստեփանյանը տեղեկացրել էր, որ դիվերսիայի փորձը կասեցվել է, և թշնամին կորուստ տալով հետ է շպրտվել: 05:20-ից սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:

Անցած գիշերվա ընթացքում հայ-ադրբեջանական սահմանին պահպանվել է հարաբերական անդորր։ Այս մասին ֆեյսբուքյան իր էջում գրել է ՊՆ մամուլի խոսնակ Շուշան Ստեփանյանը:

«Հակառակորդը սահմանի բոլոր ուղղություններով կիրառել է միայն տարբեր տրամաչափի հրաձգային զենքեր։ ՀՀ ԶՈՒ-ն վստահորեն վերահսկում են սահմանային իրավիճակը սահմանագոտու ամբողջ երկայնքով»,-գրել է մամուլի խոսնակը:

Մանրամասները՝ տեսանյութում:

Zham.am