Բանակը վերականգնում է այն կորուստները, որ մեր իշխանություններն ունենում են արտաքին քաղաքականությունում. Արա Հակոբյան. Տեսանյութ

Ադրբեջանը մեկ անգամ չէ, որ հայտնել է, թե ինչ է ուզում, ասում են, որ իրենց խնդիրն ի վերջո Ադրբեջանի տարածքային ամբողջությամբ վերականգնումն է և ավելին՝ Երևանն էլ իրենք համարում են ադրբեջանական տարածք: Այս մասին Tert.am-ի հետ զրույցում նշել է «Ազգային օրակարգ» կուսակցության խորհրդի նախագահ Արա Հակոբյանը՝ անդրադառնալով հայ-ադրբեջանական սահմանի հյուսիս-արևելյան հատվածում վերջին օրերին ստեղծված լարվածությանը: 

Հարցին՝ ինչո՞ւ է Ադրբեջանը հիմա լարում իրավիճակը, Հակոբյանը պատասխանեց, որ հավանաբար իրավիճակն է հարմար համարվել, նաև երկրում ստեղծված ներքին լարվածությունը պարպելու համար. «Այս երկու տարիների ընթացքում մեր կրավորական կեցվածքի արդյունքում Ադրբեջանը բանակցային գործընթացում ձեռք է բերել որոշակի լեգիտիմ իրավունք պատերազմով, ուժային մեթոդով խնդիրը լուծելու և կարծում եմ՝ հարմար են գտել այս պահը»:

Արա Հակոբյանը նշեց, որ միջազգային հանրության արձագանքը ստեղծված իրավիճակին պարիտետային է, հավասարակշռող: «Դա չի նշանակում, որ դա նորմալ է: Մասնավորապես, երբ դու հավասարակշռող արձագանք ունես կառույցներից, որտեղ դու ներգրավված ես, և ռազմավարական գործընկերներից, նկատի ունեմ ՀԱՊԿ-ին և Ռուսաստանին, նշանակում է, որ դու, որպես պետություն, այդ երկրների հետ հարաբերություներում խնդիր ունես, և մենք գիտենք այդ մասին»,- ասաց նա:

Մեր ռազմավարական գործընկերների նման արձագանքը, ըստ նրա, համարժեք է այն միջպետական հարաբերություններին, որ մենք ունենք:

Անդրադառնալով հայկական կողմի խաղաղասիրական հայտարարություններին, մասնավորապես նրան, որ Հայաստանը ցանկանում է, որ արցախյան հիմնախնդրի լուծումը ընդունելի լինի Հայաստանի, Արցախի և Ադրբեջանի ժողովրդի համար, Արա Հակոբյանը նշեց, որ կեղծ բանաձև է, քանի որ չկա երեք ժողովուրդ, կա երկու ժողովուրդ, երեք կողմ:

«Երբ դու ամեն անգամ խոսում ես երեք ժողովուրդների մասին, Ադրբեջանին տալիս ես հնարավորություն արհեստական երրորդ ժողովուրդ ստեղծելու»,- ասաց նա՝ նկատելով, որ մեր նման հայտարարությանը Ադրբեջանը պատասխանում է, որ պետք է Ղարաբաղը գրավել և որ իրենց թշնամին հայությունն է:

Արա Հակոբյանի խոսքով՝ հայկական կողմը պետք է շարժվի «Ազգ, պետություն, բանակ» բանաձևով: «Սա է այն բանաձևը, որի շուրջ պետք է համախմբվի հայությունն ընդհանրապես, սա է այն բանաձևը, որին պետք է հետամուտ լինի ցանկացած իշխանություն, սա է այն բանաձևը, որ մեզ բերել է հաղթանակ արցախյան պատերազմում»,- ասաց նա:

Հակոբյանի խոսքով՝ մեր արտաքին քաղաքականության կորուստները վերականգնվում, ի չիք են դարձվում մեր զինվորականների կողմից, մեր գեներալների կողմից, որոնց մասին տարբեր ժամանակներում ներկա իշխանությունները ինչ ասես, որ չեն ասել: Այդ գեներալները վերականգնում են այն կորուստները, որ մեր իշխանություններն ունենում են արտաքին քաղաքականության մեջ»,- ասաց նա: