Եթե մեր բանակը կարողանա հաջողությունը զարգացնել և իր բնագիծն ընդլայնի մինչև Ղազախ, ադրբեջանական ռեժիմը դեռևս երկար ժամանակ ուշքի չի գա. Գրիգորի Այվազյան․ Տեսանյութ
Բաքվի ցույցերը հիշեցնում են 1990 թ. հայերի ջարդերը, դա ոչ թե տարերային և ինքնաբուխ խառնամբոխ է, այլ պետականորեն կազմակերպված հավաք. ամեն դեպքում, ինչ-որ պահի այդ ցուցարար զանգվածը դուրս եկավ վերահսկողությունից և արտահայտեց իշխող ալիևյան վարչախմբի հանդեպ իր ատելությունը: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Ադրբեջանահայերի ասամբլեա» ՀԿ նախագահ Գրիգորի Այվազյանը:
«Ադրբեջանցի ժողովուրդ գոյություն չունի, դա բազմազգ երկիր է, կան անդրենածին ժողովուրդներ՝ թալիշներ, լեզգիներ, ցախուրներ, ավարներ, որոնք մեր նկատմամբ բացասաբար տրամադրված չեն: Ադրբեջանը կոտորում է ազգային փոքրամասնությունների ներկայացուցիչներին՝ նրանց ուղարկելով առաջնագիծ: Ադրբեջանցիները փորձում են շահագործել մահմեդական համերաշխության սկզբունքը, բայց տեղի ժողովուրդների էլիտան հասկանում է՝ հայերն այս դեպքում նրանց բնական դաշնակիցներն են»,- ասել է ադրբեջանագետը:
Ըստ Այվազյանի՝ Ադրբեջանի ժողովրդի համար այսօր ակնհայտ է, որ իրենց բանակը շռնդալից պարտություն է կրել, իշխող վերնախավն էլ գերագնահատել է սեփական հնարավորությունները. «Այսօր Ադրբեջանում կադրային զտումներ են, այդ երկրի տնտեսությունը ծանր վիճակում է, կորոնավիրուսն էլ է խոչընդոտում զարգացմանը, և Ալիևը փորձեց հանրության ուշադրությունը շեղել դեպի սահմանագիծ, մտածեց՝ հիմա Հայաստանին հարվածելու հարմար պահն է:
Թշնամին ընտրել է Տավուշը՝ հնարավոր հիմնական ճակատից՝ Արցախից մեր ուշադրությունը շեղելու նպատակով»:
Ադրբեջանագետի կարծիքով՝ Ադրբեջանի համար մարդկային և նյութական կորուստները որևէ նշանակություն չունեն, կարևորը իշխանության շարունակականությունն ու հավերժացումն է. «Եթե հայկական զինուժը կարողանա հաջողությունը զարգացնել և իր բնագիծն ընդլայնի մինչև Ղազախ, ադրբեջանական ռեժիմը դեռևս երկար ժամանակ ուշքի չի գա: Սա սողացող պատերազմի դրվագներից մեկն է, ու այդ պայքարն ընթանում է նաև դիվանագիտական ճակատում: Բաքուն այսօր էլ պնդում է, թե Հայաստանն է հարձակվել իր վրա»:
Գրիգորի Այվազյանի պնդմամբ՝ Ապրիլյան պատերազմից հետո արդեն երկրորդ անգամ փշրվում է ադրբեջանական բանակի անպարտելիության միֆը, որով տասնամյակներ շարունակ կերակրել էին իրենց հանրությանը. «Մեր հաղթանակները պետք է լինեն նաև տեղեկատվական ճակատում, պետք է աշխատել արտաքին քաղաքական դաշտում: Ադրբեջանցիներն ամենևին չեն երազում շահիդ դառնալու, մայրերն էլ՝ որդիների դագաղներն ստանալու մասին, այն էլ՝ հանուն Արցախի, որի տեղն էլ քարտեզի վրա չգիտեն:
Եթե վերսկսվեն պատերազմական գործողությունները, պետք է անմիջապես ճանաչել Արցախի անկախությունը»:
«Հայկական բանակը ֆաշիստական Ադրբեջանին պետք է պարտադրի անվերապահ կապիտուլյացիա: Ալիևն անընդհատ հուշում է, թե ադրբեջանցի ժողովրդի համար որն է ընդունելի լուծումը: Եթե Ադրբեջանը խաղաղություն չի ցանկանում, այն պետք է փաթաթել նրա վզին բացառապես ուժով: Միայն այդպես, կանխարգելիչ հարվածներով կարելի է ստիպել հակառակորդին ծնկի գալ»,- ամփոփել է Ադրբեջանահայերի ասամբլեայի նախագահը:
Հետևեք մեզ Facebook-ում