Նիկոլ Փաշինյանը ոչ միայն որևէ հայտարարություն չի անում, այլև հաջորդ օրը տալիս է հիմնավորում, թե ինչու Ադրբեջանը կարող է հատած լինել մեր սահմանը. Աննա Աբրահամյան. Տեսանյութ

Ադրբեջանի հարձակման փորձը, սադրանքն ամենևին էլ անսպասելի չէր։ Այս ամենը ոչ միայն կապված է տարածաշրջանում առկա իրողությունների, այլ նաև Մերձավոր Արևելքում տեղի ունեցող իրադարձությունների հետ։ Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է միջազգայնագետ Աննա Աբրահամյանը՝ անդրադառնալով վերջին օրերին հայ-ադրբեջանական սահմանային գոտում տիրող լարվածությանը։

Միջազգայնագետի խոսքով՝ Ադրբեջանն ու Թուրքիան գտնվում են տնտեսական շատ վատ կարգավիճակում, չեն կարողացել պատշաճ ձևով հաղթահարել կորոնավիրուսի համավարակը, բայց Մերձավոր Արևելքում փորձում են իրենց ռազմական գործունեությունն ու ագրեսիվությունը առաջ տանել։

Աննա Աբրահամյանն ընդգծում է, որ հայկական կողմը ընտրել է խաղաղասիրությանը ճանապարհը, մինչդեռ մյուս կողմը ագրեսիվ դրսևորումներով է հանդես գալիս, հետևաբար սպասելի էր, որ նման ռազմական գործողությունների կարող է անցնել Ադրբեջանը։

Հարցին, թե հայկական կողմի խաղաղասիրական կոչն ո՞ւմ էր ուղղված, Աննա Աբրահամյանը նշել է․ «Նիկոլ Փաշինյանը դեպքերի ամբողջ օրը լուռ էր։ Մինչդեռ մենք միևնույն ժամանակ տեսանք, որ Ադրբեջանը բոլոր կառույցներով մեղադրում էր հայկական կողմին, իսկ մեր գերագույն գլխավոր հրամանատարն անգամ այդ կառույցներին չէր էլ փորձում ներկայացնել, թե ինչպես է հակառակորդը փորձել հատել սահմանը»։

Միջազգայնագետի համոզմամբ՝ Հայաստանի իշխանության ուշացած ու անհասկանալի հայտարարությունը Ադրբեջանին միջազգային կառույցներին դիվիդենտներ է տալիս։

Հարցին՝ Կառավարության նիստին ՀՀ վարչապետի հարցը ՊՆ նախարար Դավիթ Տոնոյանին պատահականություն էր արդյոք, ի՞նչ էր այն, Աննա Աբրահամյանը պատասխանել է․ «Պատահական ոչ մի բան Նիկոլ Փաշինյանը չի անում, նա իր տարերքի մեջ է։ Նիկոլ Փաշինյանը ոչ միայն որևէ հայտարարություն չի անում, այլ նաև հաջորդ օրը տալիս է հիմնավորում, թե ինչու Ադրբեջանը կարող է հատած լինել մեր սահմանը»։

Միջազգայնագետի դիտարկմամբ՝ ոչ թե մենք պետք է պարզաբանենք՝ ինչու է հակառակորդը հատել սահմանը, այլև իրենք․ «Նիկոլը, որ մեր երկրի միակ առաջնորդն է, ով հակառակորդ երկրի ղեկավարին ասել է կիրթ ու գրագետ և վերջինիս հետ սահմանել է հատուկ օպերատիվ կապ, փաստորեն ազատում է վերջինիս այն օղակից, որով կարող էինք հենց նույն Ադրբեջանին խեղդել միջազգային կառույցների առաջ»։