Լավրովը կոչ է արել Թուրքիային՝ չսպառնալ Հայաստանին

Շատերը նկատեցին, որ հայ-ադրբեջանական սահմանային միջադեպի կապակցությամբ ամենաագրեսիվ դիրքերից հանդես եկավ Թուրքիան: Ավելին, այդ երկրի ԱԳ նախարարը փաստացի սպառնաց  մեր երկրին՝ «չթողնել Ադրբեջանին  միայնակ Հայաստանի հետ հակամարտության հարցում»: Տպավորությունն այնպիսին է, որ ադրբեջանական սադրանքների ծրագրերում Թուրքիան  համահեղինակի դեր է կատարում: Իսկ ահա Ադրբեջանի պաշտոնական ներկայացուցիչները չեն էլ թաքցնում, որ Հայաստանի հետ  հնարավոր հակամարտության հարցում նրանց հիմնական հույսը  Թուրքիան է:

Թուրքիայի պաշտոնական արձագանքից անմիջապես հետո, Հայաստանի ԱԳ նախարար Զոհրաբ Մնացականյանը հեռախոսազրույց է ունենում Ռուսաստանի ԱԳ նախարար Սերգեյ Լավրովի հետ, որից հետո, անմիջապես, Լավրովը նախազգուշացնում է Թուրքիային ձերծ մնալ  սպառնալիքներ հնչեցնելուց՝ Հայաստանի հարցեին:

«...Ռուսական կողմը կարևորում է, որ Մինսկի խմբի բոլոր անդամները զերծ մնան այնպիսի հայտարարություններից, որոնք կարող են էլ ավելի սրացման հանգեցնել առանց այն էլ լարված իրավիճակը հայ-ադրբեջանական սահմանում...»:

Միջազգային բոլոր կողմերն այս հայտարարությունը գնահատեցին որպես մեսիջ՝ ուղղված Թուրքիային, քանզի Մինսկի խմբի անդամներից միայն այդ երկիրն էր հանդես եկել սպառնալիքներով՝ ուղղված Հայաստանի հասցեին:

Հենց այդ պատճառով էլ ՀԱՊԿ-ի մշտական խորհրդի արտակարգ նիստը ձեռնպահ մնաց կտրուկ հայտարարությունից:

Այս ամենը կրկին ցույց տվեց, որ Հայաստանի համար նման ծանր վիճակում թերևս միայն Մոսկվայի մեսիջը կարող է լուրջ ազդեցություն թողնել Թուրքիայի վրա:

Սա է իրականությունը:

Արտակ Հակոբյան