ԱՄՆ պետդեպը խորհրդական կվարձի կոռուպցիայի դեմ պայքարում Հայաստանին օգնելու համար. RT

ԱՄՆ Պետական դեպարտամենտը մտադիր է մասնագետ վարձել, որը կօգնի Հայաստանի կառավարությանը կոռուպցիայի դեմ պայքարում: Նա պետք է համագործակցի ՀՀ Արդարադատության նախարարության հետ և օժանդակի բարեփոխումների առաջխաղացմանը: Այս մասին հաղորդում է RT-ն ամերիկյան գերատեսչության համապատասխան փաստաթղթին ծանոթանալուց հետո: 

«Խորհրդականը աջակցելու է Հայաստանի կառավարությանը հակակոռուպցիոն նոր մարմինների ստեղծման և արդյունավետության (այդ թվում Հայաստանի հակակոռուպցիոն կոմիտեի ձևավորման փուլում գտնվող գործընթավում) բարձրացման հարցում: Այդ կառույցները հետաքննելու են կոռուպցիոն դեպքեր և պատասխանատվության ենթարկելու կոռուպցիոներներին», - ասվում է փաստաթղթում: 

Բացի այդ, մասնագետը պետք է խորհրդատվություն տրամադրի Հայաստանի իշխանություններին՝ իրավապահ համակարգում բարեփոխումների մշակման և իրագործման հարցում: Նա պետք է համագործակցի Արդարադատության նախարարության և իրավապահ այլ մարմինների հետ:

«Նախապատրաստել, ուսուցանել, ինչպես նաև այլ տեխնիկական աջակցություն տրամադրել Արդարադատության նախարարությանը, Հայաստանի հակակոռուպցիոն կոմիտեին, երբ ստեղծվի, և քրեական արդարադատության այլ համապատասխան ինստիտուտներին՝ հարցերի լայն շրջանակի վերաբերյալ, միևնույն ժամանակ առաջնահերթություն տալով կոռուպցիայի դեմ պայքարին բարձր մակարդակում», - հայտնում են ԱՄՆ պետդեպում:

Խորհրդականը կզբաղվի նաև ուսուցողական ուղևորությունների կազմակերպմամբ, Վաշինգտոնի կողմից ֆինանսավորվող ծրագրերի կառավարմամբ և քննիչների համար  թրենինգներով:

Նշվում է, որ այդ պաշտոնին կարող են հավակնել միայն ԱՄՆ քաղաքացիները:

Ավելի վաղ հայտնի էր դարձել, որ ԱՄՆ ծրագրում է 10 մլն դոլար ծախսել Հայաստանում հակակոռուպցիոն կոմիտեի առաջխաղացման վրա: 

Zham.am