Փաստաբան. Դատարանները ամբողջությամբ անհասանելի կդառնան մեր բնակչության անապահով խավի համար

ՀՀ հարգելի իշխանություններ, 

երեկ տեղեկացա, որ շրջանառության մեջ է դրվել օրենքի մի նախագիծ, համաձայն որի նախատեսվում է դատարան դիմելու եւ դատական ակտերը բողոքարկելու համար սահմանված պետական տուրքեր էապես ավելացնել: Հստակ չգիտեմ ինչ նպատակով է դա արվում: Կարող եմ միայն ենթադրել, որ դատարանների ծանրաբեռնվածությունը թեթեւացնելու համար: Եթե այդպես է, ապա ինչ խոսք, խնդիրը ավելի քան կարեւոր եւ արդիական է: Բայց կցանկանայի նաեւ Ձեր ուշադրությունը հրավիրել այն հանգամանքի վրա, որ պայմանավորված մեր ազգաբնակչության սոցիալական դրությամբ, անգամ ներկայումս գործող սակագների պարագայում, մեր բնակչության զգալի հատվածը իվիճակի չէ վճարել պետական տուրքը եւ փաստացի զրկված է դատական պաշտպանության իր սահմանադրական իրավունքի իրականացման հնարավորությունից: Սակագների նախատեսվելիք բարձրացման դեպքում իմ` որպես իրավաբան գիտնականի եւ պրակտիկ փաստաբանի կարծիքով, դատարանները ամբողջությամբ անհասանելի կդառնան մեր բնակչության անապահով խավի համար:

Անգամ միջին խավ համարվող մեր քաղաքացիների համար դա շատ դեպքերում կստեղծի դատական պաշտպանության իրավունքի իրացման անհաղթահարելի խոչընդոտներ: Կարծում եմ դատարանների ծանրաբեռնվածության խնդիրը, եթե իհարկե ճիշտ եմ կռահել նախագծի նպատակը, կարելի է լուծել այլ ոչ այդքան ցավալի եւ վտանգավոր եղանակով: Անհրաժեշտության դեպքում պատրաստ եմ անհատույց իրավաբանական խորհրդատվություն տրամադրել այս հարցի կապակցությամբ:

Ասեմ նաեւ որ քաղաքականությամբ չեմ զբաղվել եւ չեմ զբաղվելու, հակահեղափոխական չեմ եւ չեմ դառնալու, նախկինների հետ որեւէ կաշկանդող կապեր չունեմ: Թե նախկինում թե հիմա իշխանություններին քննադատել եւ քննադատում եմ սեփական նախաձեռնությամբ, բացառիկ դեպքերում, զուտ իմ, որպես իրավաբան գիտնականի առաքելությունը իրականացնելու նպատակով:

Կարեն Սարդարյանի ֆեյսբուքյան էջից