Երևանի ավագանու ընտրության առաջադրումները մեկնարկեցին

Երևանի ավագանու ընտրություններին առաջադրումների փուլը մեկնարկում է: Մարտի 30-ից ապրիլի 9-ը կուսակցությունները, կուսակցությունների դաշինքները գրանցման համար փաստաթղթերը ներկայացնում են ԿԸՀ, ընտրական ցուցակների գրանցումը կատարվում է ապրիլի 9-ից 14-ը:

Ինչպես տեղեկացնում է ՀՀ կենտրոնական ընտրական հանձնաժողովի կայքը, Երևանի ավագանու ընտրությունների վճարովի եթերաժամի սակագները տատանվում են ՝ հեռուստաընկերությունների դեպքում մեկ րոպեն 10 000-ից 100 000 դրամի, իսկ ռադիոընկերությունների պարագայում՝ մեկ րոպեն 1800-ից 2500 դրամի սահմաններում: ՀՀ ոստիկանության տվյալներով՝ Երևանում ընտրողների թիվը 841 937 է:

Նախընտրական քարոզչության ժամանակահատվածը սկսվում է ապրիլի 21-ին, ավարտվում մայիսի 12-ին: Քվեարկությունը սկսվում է մայիսի 14-ին՝ 08:00-ին, ավարտվում նույն օրը՝ 20:00-ին:

Երևանի ավագանու նախորդ ընտրությունները կայացել են 2013-ի մայիսի 5-ին:

Ընտրության արդյունքներով, ՀՀԿ-ն ստացել է 521 127 ձայն, ԲՀԿ-ն՝ 214 634 ձայն, «Բարև Երևան» դաշինքը՝ 78 119, ՀԱԿ-ը՝ 40 660 ձայն, ՀՅԴ-ն՝ 35 067, ՕԵԿ-ը՝ 34 702, «Առաքելություն» կուսակցությունը՝ 5 892 ձայն:

ԿԸՀ որոշման համաձայն՝ Երևանի ավագանու կազմում ընդգրկվել են ՀՀԿ ընտրական ցուցակից՝ 42, ԲՀԿ-ից՝ 17 անդամ, «Բարև Երևան» դաշինքի ցուցակից` 6 անդամ: Ընտրապայքարի մասնակից քաղաքական ուժերից 4-ը՝ ՀԱԿ-ը, ՀՅԴ-ն, ՕԵԿ-ը և «Առաքելություն»-ը, չեն հաղթահարել սահմանված 6 տոկոս շեմը: