Լրատվամիջոցի նկատմամբ խտրական վերաբերմունք է ձևավորվել․ այլ ՀԸ-ներում նման խախտումներ չե՞ն լինում․ Աստղիկ Ավետիսյանը՝ «Արմնյուզ» ՀԸ-ի նկատմամբ վարչական վարույթ հարուցելու մասին
Լրատվամիջոցի նկատմամբ խտրական վերաբերմունք է ձևավորվել: Արդյո՞ք այլ հեռուստաընկերություններում, այլ հաղորդումներում նման խախտումներ չեն եղել և չեն լինում: Այս մասին այսօր Tert.am-ի հետ զրույցում ասաց Հայկական PR ասոցիացիայի նախագահ, ԵՊՀ ժուռնալիստիկայի ֆակուլտետի դոցենտ Աստղիկ Ավետիսյանը՝ խոսելով այն մասին, որ այսօր ՀՀ Ոստիկանության ծառայողներն այցելել են «ԱրմՆյուզ» ՀԸ վարչական վարույթ հարուցելու նպատակով:
Նշենք, որ վարչական վարույթ հարուցելու պատճառաբանությունն այն է, որ «Արմնյուզ» հեռուստաընկերության հեռուստամեկնաբաններից մեկը տաղավարում դիմակ չի կրել:
«Ինչո՞ւ ենք մենք խնդրին ընտրողաբար մոտենում, ինչո՞ւ ենք թիրախավորում մեկ կամ երկու հեռուստաընկերություն, ինչո՞ւ ենք անընդհատ խուճապային իրավիճակ առաջացնում, ինչո՞ւ ենք ճնշում լրագրողական աշխատանքը, սրանք հարցեր են, որոնց պետք է պատասխաններ տրվեն: Եթե իրավական խնդիր կա, ապա որոշակի առումով քաղաքական խնդիր էլ կա»,- ներկայացրեց Ավետիսյանը:
Հայկական PR ասոցիացիայի նախագահը նշեց, որ իրավական առումով՝ այս մոտեցումն արդարացի չէ, քանի որ արդարության հաստատումը պետք է համընդհանուր լինի, իսկ քաղաքական տեսանկյունից՝ չպետք է լինեն թիրախավորված լրատվամիջոցներ, որոնց վրա կարող են այդ ճնշումներն ակնհայտ երևալ:
«Ոստիկանները հաղորդում են ստացել, որի հիման վրա էլ այցելել են հեռուստաընկերություն, բայց ես ի սկզբանե չեմ հասկացել տաղավարում լրագրողների, հաղորդավարների դիմակ կրելու հանգամանքը, ինչպես և անհասկանալի է ընտանիքով մեկ մեքենայի մեջ լինելու պարագայում պարտադիր դիմակ կրելու որոշումը: Այնպես չէ, որ ես ավելի քիչ եմ մտածում իմ ընտանիքի անդամների առողջության մասին, քան երկրի ղեկավարը»,- ասաց նա և հավելեց, որ նման օրինակների ենք ականատես լինում, քանի որ ընդունված որոշումներն առաջին հերթին հստակեցված չեն և յուրաքանչյուր պահի փոփոխվում են:
Ըստ նրա՝ գուցե տաղավարում դիմակ կրելու պարտադրանքը կախված է նրանից, որ հասարակության մեջ զգաստություն առաջանա, սակայն յուրաքանչյուր ոք ինքը պետք է իր համար կարևոր առաջնահերթություններ սահմանի: «Մի քանի օր առաջ ես էլ տաղավարում հյուր էի, դիմակս հանել եմ, հաղորդավարը ևս, որովհետև անհրաժեշտ անվտանգության կանոնները պահպանվել են, հիմա գուցե այս մասո՞վ էլ վարչական վարույթ հարուցվի»,- ասաց Ավետիսյանը և հարցին, թե գուցե «Արմնյուզ» ՀԸ-ի օրինակը ազդակ էր մյուս հեռուստաընկերություններին և նրանց ևս այցելելու են, վերջինս պատասխանեց․ «Այնքան խնդիրներ կան, որոնց լուծման հետքերով պետք է գնանք, այլ ոչ թե այսպիսի տարրական խնդրի: Եթե տաղավարում ես չեմ կարողանում դիմակով խոսել, խնդրում եմ ապահովվել անհրաժեշտ պայմանները՝ սոցիալական հեռավորություն, օդափոխություն և ես որևէ օրենք չեմ խախտում: Չեմ կարծում, որ Աբրահամ Գասպարյանը ևս խախտել է հակահամաճարակային կանոնները:»
Ավետիսյանի խոսքով՝ հարցին պետք է մի քանի տեսանկյունից մոտենալ: Ըստ նրա՝ առաջին այն է, որ եթե տաղավարն ապահովված է համավարակի համատեքստում սահմանված անվտանգության կանոններով՝ սոցիալական հեռավորություն, օդափոխության համակարգի առկայություն, ախտահանման գործընթացի իրականացում, ապա պարտադիր չէ դիմակ կրելը:
«Շատ կարևոր է, որ յուրաքանչյուր հաղորդակցություն գրագետ կառուցվի և դիմակ կրելը ինքնանպատակ չլինի, չդառնա խուճապի տարածման բաղկացուցիչ մաս: Ուղերձները պետք է փոխանցեն ոլորտի մասնագետները, ոչ թե քաղաքական գործիչները, որոնք չունեն անհրաժեշտ գիտելիքներ առողջապահության ոլորտում, հասարակության մոտ վստահություն չեն ներշնչում և երբեմն էլ իրարամերժ տեղեկատվություն են փոխանցում»,- ասաց Աստղիկ Ավետիսյանը:
Հետևեք մեզ Facebook-ում