Օտարերկրացիների՝ Վրաստանում գտնվելու օրինական ժամկետը երկարաձգվել է

Օտարերկրացիների կամ քաղաքացիություն չունեցող անձանց՝ Վրաստանում գտնվելու օրինական ժամկետը ևս մեկ ամսով երկարաձգվել է, հայտնում է aliq.ge-ն։

Կառավարության որոշման մեջ համապատասխան փոփոխություններ են կատարվել 2020 թվականի հունիսի 28-ին: Խոսքն այն անձանց մասին է, որոնք մարտի 14-ի դրությամբ օրինական են գտնվել Վրաստանում և մի շարք պատճառներով մինչ օրս չեն կարողացել լքել երկիրը: Նրանց՝ Վրաստանում օրինական գտնվելու վերջնաժամկետ է սահմանվել 2020-ի հուլիսի 31-ը:

Երկրում լինելու հիմնավոր պատճառ կարող է համարվել՝

• եթե այն պետությունը, որի քաղաքացին է տվյալ անձը, համարվում է  կորոնավիրուսի ռիսկային գոտի,
• եթե համապատասխան պետության կողմից սահմանափակվել է սահմանը հատելը,
• եթե անձը գտնվում է հիվանդանոցում, կարանտինում կամ ինքնամեկուսացված է,
• եթե անձը չի կարող լքել Վրաստանը՝ չվերթների բացակայության պատճառով։

Անձը պարտավոր է ներկայացնել փաստաթուղթ այն հանգամանքի մասին, որից ելնելով՝ ստիպված է մնալ Վրաստանի տարածքում: Միաժամանակ, կառավարության որոշման մեջ ասվում է, որ այս ընթացքում Վրաստանում գտնվելը չի կարող կեցության իրավունք ստանալու հիմք հանդիսանալ: