Ֆինանսական աջակցություն կտրամադրվի ՏՏ ոլորտի ստարտափներին (տեսանյութ)

200.000 ԱՄՆ դոլար մասնավոր ընկերությունների կողմից ստարտափներին`
նորարար գաղափարներ կյանքի կոչելու համար: ՀՀ տրանսպորտի, կապի և
տեղեկատվական տեխնոլոգիաների նախարարությունում մարտի 29-ին կայացած
ասուլիսում նախարար Վահան Մարտիրոսյանը և գործարարներ Արա Յաղջյանն ու
Էդուարդ Մարությանը ներկայացրին ՏՏ ոլորտի սկսնակ ընկերությունների
ֆինանսավորման համատեղ նախաձեռնությունը:

«Ամիսներ շարունակ նախարարությունում ՏՀՏ ոլորտի առաջատար
ընկերությունների ներկայացուցիչների հետ հանդիպումների ու քննարկումների
արդյունքում եկանք եզրակացության, որ Հայաստանում բիզնես սկսող
ընկերությունները, ունենալով փայլուն գաղափարներ, հաճախ հանդիպում են
ֆինանսական դժվարությունների, և կայացած ընկերություններին առաջարկեցինք
աջակցել սկսնակներին»,-ներկայացրեց Վահան Մարտիրոսյանը:

«Ռիսկերի ճիշտ գնահատման և ճիշտ ընտրության դեպքում կատարված ներդրումը
կարող է լինել շահութաբեր այն կատարողի համար: Գործընկերներիս հետ համատեղ
որոշում կայացրինք սկսել պիլոտային ծրագիր` մի քանի գաղափարների և
ստարտափների աջակցելու նպատակով»,- ասաց «Զանգի» ընկերության համահիմնադիր
Էդուարդ Մարությանը:

Այս փուլում նախատեսվում է ֆինանսավորել 10 գաղափար: Հայտերը կընդունվեն
մինչև ապրիլի 13-ը: Գաղափարները պետք է վերաբերեն ՏՀՏ (ծրագրային
ապահովում, ինտերնետ, թվային մեդիա, մոբայլ տեխնոլոգիաներ),
ճարտարագիտության (սարքավորումներ, ծրագրային ապահովում և էլեկտրոնիկա),
մաքուր տեխնոլոգիաների, զբոսաշրջության, գյուղատնտեսության ոլորտներին:

Նախաձեռնության մասնակից, գործարար Արա Յաղջյանի խոսքով` ծրագիրը կարող է
լավ խթան դառնալ երիտասարդ ձեռներեցների և, առհասարակ, ՏՏ ոլորտի զարգացման
համար: «Մենք տրամադրելու ենք ոչ միայն ֆինանսական, այլև խորհրդատվական,
հաշվապահական աջակցություն: Դրանից բացի, այդ ստարտափները կարող են օգտվել
մեր ռեսուրսներից, կապերից»,- ընդգծեց Արա Յաղջյանը:

Նախարարը շեշտեց, որ ծրագրի ներկայի բյուջեն նախնական է, և արագ աճի
պոտենցիալ ունի` հասնելով միլիոնների: Ծրագրի հաջողության դեպքում
նախատեսվում է ստեղծել մասնավոր վենչուրային հիմնադրամ` «բիզնես
հրեշտակներ»-ի (angel investor) մասնակցությամբ: «Բիզնես-հրեշտակները»
ներդրողներ են, ովքեր պատրաստ են իրենց ազատ գումարները ներդնել որևէ ՏՀՏ
նախագծում՝ շահաբաժին ստանալու ակնկալիքով:

Հիմնադրամը կլինի Հայաստանում իր տեսակի մեջ առաջինը, որովհետև
կֆինանսավորի ոչ թե արդեն ստեղծված ընկերություններ, այլ հենց բիզնես
գաղափարը` սկզբնական փուլում:

Այլ մանրամասներ՝ տեսանյութում...

ՀՀ տրանսպորտի, կապի և տեղեկատվական տեխնոլոգիաների
նախարարության լրատվական ծառայություն