Ժողովուրդ ջան, որ սառնարանը բացում եք՝ լի՞քն է, աշխատավարձերը բարձրացե՞լ են, աշխատատեղեր ավելացե՞լ են. Է. Շարմազանով. Տեսանյութ

ՀՀԿ ԳՄ անդամ Էդուարդ Շարմազանովի կարծիքով՝ 2 տարի շարունակ այն, ինչ տեղի է ունենում Հայաստանում Նիկոլ Փաշինյանի օրոք, ժողովրդավարության հետ աղերս չունի:

168TV-ի «Ռեվյու» հաղորդման ընթացքում նա ընդունեց, որ սխալվել է, երբ ժամանակին հույսեր է փայփայել, թե Արմեն Սարգսյանը կարող է իրականացնել Սահմանադրությամբ նախագահին տրված լիազորությունները. «Պետական մտածողության և խիզախության բացակայությունը վերաբերում են թե՛ Արմեն Սարգսյանին, թե՛ «Լուսավոր Հայաստանին»»:

Էդուարդ Շարմազանովի կարծիքով՝ Սահմանադրական դատարանի դատավորներն ապացուցել են, որ ունեն բացառիկ պետական մտածողություն. «Նիկոլ Փաշինյանը, իմ տպավորությամբ՝ գնալու է բախումների, ինքը դրա մասին անկեղծ էլ ասում է: Որևէ նորմալ ժողովրդավարական երկրում, երբ ընդդիմությունը ակցիաներ է կազմակերպում, իշխանությունը այդ ակցիաները, խաղաղ երթերն ու հավաքները պետք է սպասարկի, այլ ոչ թե իր կողմնակիցներին էլ դուրս բերի, որպեսզի սկսվեն բախումներ: Ինքն ի՞նչ ասաց. ասաց՝ եթե դուք հանեք, ես էլ 100 անգամ ավել իմ կողմնակիցների կհանեմ ձեր դեմ: Այսինքն՝ Նիկոլ Փաշինյանն առ այսօր չի գիտակցում, որ ինքը ոչ բարով Հայաստանի Հանրապետության վարչապետն է, և բոլորի վարչապետն է, անկախ նրանից՝ ես և դուք իրեն ընտրե՞լ ենք, թե՞ չենք ընտրել»:

Նրա խոսքով՝ Նիկոլ Փաշինյանն այս երկու տարվա ընթացքում որևէ դրական բան չի արել. «Մարդիկ ավելի վատ են ապրում: Նիկոլ Փաշինյանն անգործունակ է, նա քաղաքական իմպոտենցիայի կրողն է: Ժողովուրդ ջան, որ սառնարանը բացում եք՝ լի՞քն է, աշխատավարձերը բարձրացե՞լ են, աշխատատեղեր ավելացե՞լ են, ներդրումներ կա՞ն: Ռոբերտ Քոչարյանի գրավի համար 1 ժամվա ընթացքում 4 մլն դոլար է հավաքվում, 2 տարվա ընթացքում Նիկոլ Փաշինյանը 4 դոլարի ներդրում չի կարողացել Հայաստան բերել»: