Արմեն Սարգսյանն այլևս բարոյական իրավունք չունի շարունակելու զբաղեցնել ՀՀ նախագահի պաշտոնը

Մարդիկ լինում են տարբեր տեսակի՝ խիզախ, վախկոտ, թույլ, ուժեղ, թուլակամ, վճռական, կոմպրոմիսային: Մի խոսքով, կարելի է ներկայացնել մարդկային տեսակի ողջ գամման, բայց միևնույնն է, մենք բաց կթողնենք նաև մի ուրույն մարդկային տեսակ, որը ՀՀ նախագահ Արմեն Սարգսյանի տեսակն է: Ասել, որ նա վախկոտ է կամ թուլակամ, նշանակում է ոչինչ չասել: Ասել, որ նա սրիկա է, նույնպես նշանակում է ոչինչ չասել: Այս տեսակը պետք է առաջարկել մտցնել «կարմիր գրքի» մեջ, քանզի այս մարդու նման լինելը իսկապես նորություն է Homo sapiens  տեսակի մեջ:

Դատեք ինքներդ, որ այս մարդը բացի շնորհավորանքներ ուղարկելուց և ընդունելուց ոչ մի այլ գործով չի զբաղվում: Երբ նրան մեղադրում են, թե ինչո՞ւ նա ակտիվ դեր չի կատարում, պատասխանում է առաջին հայացքից ողջամիտ բանաձևով.  «Ես քաղաքական պաշտոն չունեմ, չունեմ լուրջ լիազորություններ, որպեսզի կարողանամ ազդել գործընթացների վրա, որի մեղավորները նախկիններն են...»:

Առաջին հայացքից թվում է, թե խելքին մոտ պատասխան է: Եվ իրոք, թվում էր`  արժեր պայքարել նրա լիազորությունների ավելացման համար, մանավանդ, որ դրանով մենք կկարողանայինք հավասարակշռել նաև երկրի կառավարման համակարգը: Սակայն այս վերջին իրադարձություններից հետո պարզ է դառնում, որ Արմեն Սարգսյանին այս, կներեք արտահայտությանս համար,   «տանձի պոչի» կարգավիճակը ոչ միայն դուր է գալիս, այլև յուրօրինակ ալիբի է  տարատեսակ կոնֆլիկտների մեջ չմտնելու համար: Ավելին`  իր հանգիստ կյանքը վայելելու համար նա պատրաստ է նույնիսկ էլ ավելի կրճատել իր լիազորությունները, միայն թե կարողանա պահպանել իր ՀՀ նախագահի տիտղոսը:

Այն, թե ինչու է այս անձնավորությունն ուզում պահպանել իր տիտղոսը,  հասկանալի է, սակայն ինչի՞ ենք մենք հանդուրժում նման մարդկանց, այ դա արդեն անհասկանալի է: Այս հարցում իհարկե Փաշինյանի մեղքը առնվազն պիտի կիսեն նախկին իշխանությունները, քանզի նման մարդուն առաջադրելը նման պաշտոնում աններելի քայլ էր:

Արմեն Սարգսյանը իր վերջին զզվելի քայլից հետո այլևս բարոյական իրավունք չունի ձևացնելով բողոքել, թե իբր իր լիազորությունները թույլ չեն տալիս իրեն բացի երեխաներին պաղպաղակ բաժանելուց  այլ գործով զբաղվել:

Հասկանալի է, որ նման «տանձի պոչերը» իդեալական կադրեր են Փաշինյանի համար, սակայն այս ամենից հետո Սարգսյանը պիտի հասկանա, որ այլևս նա բարոյական իրավունք չունի մնալ այդ պաշտոնում: Հակառակ դեպքում նա նույնպես պատասխանատվություն է կրելու՝ երկրում հետագա բացասական հետևանքների զարգացման  համար:

Սա է իրականությունը:

Դավիրթ Մկրտչյան