Ջորջ Թոդորովիչը դարձել է Սերբիայի խորհրդարանի` պատմության մեջ առաջին հայազգի պատգամավորը. «ՀայԹերթ»

Սերբիայում հունիսի 21-ին տեղի ունեցած խորհրդարանական ընտրությունների արդյունքում պատգամավոր է ընտրվել երկրում իշխող «Սերբիայի առաջադիմական կուսակցության» ներկայացուցիչ, հայազգի Ջորջ Թոդորովիչը: 29-ամյա Թոդորովիչը Սերբիայի պատմության մեջ առաջին հայազգի պատգամավորն է: Այս մասին տեղեկացնում է Ստամբուլի հայկական պարբերականներից «ՀայԹերթ»-ը, փոխանցում է Tert.am-ը:

«Սերբիայի առաջադիմական կուսակցությունը» տեղի ունեցած խորհրդարանական ընտրություններում հաղթանակ է տարել` հավաքելով ձայների շուրջ 65%-ը և ստանալով խորհրդարանի 250 մանդատից 189-ը:

Ջորջ Թոդորովիչի հայրը սերբ է, մայրը` հայուհի: 1990 թվականին սերբ տղամարդու հետ ամուսնացած և Երևանից Բելգրադ տեղափոխված Կամիլա Մուրադյանն իր երեք զավակներին դաստիարակել է հայկական ավանդույթներով:

Ջորջը լիակատար տիրապետում է հայոց լեզվին և երբեք չի թաքցրել իր հայկական արմատները: Բելգրադի համալսարանը և Դիվանագիտական ակադեմիան ավարտելուց հետո նա աշխատանքի է անցել սերբական խորհրդարանի միջազգային հարաբերությունների բաժնում, իր գործունեությամբ մշտապես նպաստել է հայ-սերբական հարաբերությունների ամրապնդմանը: