«Լուսավոր Հայաստանը» կհամագործակցի՞ Ծառուկյանի հետ՝ իշխանափոխության օրակարգի շուրջ. Մարուքյանի պարզաբանումը. Տեսանյութ

Խորհրդարանի դահլիճում մենք ասել ենք, որ բավարար ապացույցներ չկան, որ Գագիկ Ծառուկյանն անձեռնմխելիությունից զրկվի: Այս մասին, այսօր՝ հունիսի 22-ին, ԱԺ ավանդական ճեպազրույցների ժամանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը:

«Ես նաեւ ասել եմ, որ հնարավոր է՝ խորհրդարանը խայտառակ լինի անձեռնմխելիությունից զրկելու պատճառով: Երեկ դա տեղի է ունեցել: 87 մարդ վստահ եմ՝ հարցեր ունի իրենց համոզողներին: Բայց դա մեր խնդիրը չի»,-ասաց նա:

Մարուքյանը հիշեցրեց, որ իրենք ԱԺ-ում նաեւ հայտարարել են, որ Գագիկ Ծառուկյանի հետ կապված քրեական գործն ունի քաղաքական վերահսկողություն:

Ինչ վերաբերում է հարցին, թե արդյոք իշխանփոխության վերաբերյալ որեւէ օրակարգ պատկերացնո՞ւմ են ԲՀԿ-ի ու Գագիկ Ծառուկյանի հետ, Մարուքյանը պատասխանեց,. «Մեզ համար, քանի դեռ օրական 600 մարդ համավարակով պայմանավորված դառնում է վարակակիր, իրական 10 եւ ավելի մահեր ենք ունենում, մենք որեւէ հրաժարականի հարց չենք բարձրացնում, բայց նաեւ ասել ենք, որ համավարակի ավարտից հետո կամ թվերի նվազումից հետո քաղաքական պատասխանատվության հարց ենք բարձրացնելու»: