Ոստիկանները հրմշտել ու հարվածել են ԱԱԾ շենքի դիմաց աշխատող լրագրողներին և օպերատորներին, տուժել է նաև Tert.am-ի լրագրողը. Տեսանյութ

ԱԱԾ շենքից ԲՀԿ ղեկավար Գագիկ Ծառուկյանի դուրս գալուց հետո, երբ պատգամավորը զրուցում էր լրագրողների հետ, ոստիկանները սկսեցին քաշքշել, հրել ու հարվածել նաև տեղում աշխատող լրագրողներին ու օպերատորներին: «Ինչ էինք արել, Գագիկ Ծառուկյանի հետ հանգիստ, նորմալ հարցազրույց էր: Ինչ աժիոտաժ ես ուզում ստեղծել, Նիկոլ, ինչի՞ համար: Ծառուկյանին դատում եք, չեք դատում, մենք ընդամենը մեր լրագրողական պարտականությունն ենք իրականացնում, Ծառուկյանին չենք պաշտպանում»,-ասաց լրագրողներից մեկը՝ նշելով, թե լրագրողները փռվեցին ասֆալտին:

Երևանի փոխոստիկանապետ Արթուր Խուդինյանը, պատասխանելով հարցին, ինչո՞վ էր պայմանավորված լրագրողների հանդեպ այդ վերաբերմունքը, պատասխանեց. «Ինչու՞ եք սուբյեկտիվ: Բոլորին հորդորում էինք, որ հետ գնան, երթևեկելի մասը բացեն: Ինչու՞ հետ չէիք գնում»,-ասաց նա:

Լրագրողներից մեկը, դիմելով ոստիկաններին, ասաց. «Ձեր ուժն էլ տեսանք»,-ինչին մի ոստիկան արձագանքեց. «Էդ մեր ամբողջ պոտենցիալը չէր հլը»:

Խուդինայնը հավելեց. «Եթե մի քիչ անհարմարություն ենք պատճառել, կներեք»:

Լրագրողները հակադարձեցին՝ հարցազրույցը դեռ ընթանում էր, իրենց ժամանակ չի տրվել լքել երթևեկելի հատվածը:

Նշենք նաև, որ վնասվածք է ստացել նաև Tert.am-ի լրագրողը: Նրա տեղեկացմամբ՝ քաշքշուկի ընթացքում կորել է ParaTV-ի ուղիղ եթերն ապահովող սարքը:

Մանրամասները՝ Tert.am-ի տեսանյութում։