Մենք նոր վարչապետի և նոր իշխանության կարիք ունենք. Կարեն Բեքարյան. Տեսանյութ

Հայաստանի ներքաղաքական այս խայտառակ իրավիճակն իր ուղղակի պրոյեկցիան ունի նաև արտաքին քաղաքականության մեջ: Այս մասին «Տողերի արանքում» հաղորդաշարի հերթական թողարկմանը նշել է վերլուծաբան Կարեն Բեքարյանը:

Նրա խոսքով՝ իշխանությունը մարդու իրավունքների, ժողովրդավարության գործընթացում այնպիսի քայլեր է թույլ տալիս, որ մեր հարաբերությունները նույն եվրոպական համայնքի հետ արժեքայինից տեղափոխվել են շահերի դաշտ:

«Հայաստանը, որը տարիներ ի վեր կառուցել էր իր հարաբերություններն արժեքային գործընկերոջ կարգավիճակում, սկսեց մեծագույն արագությամբ կորցնել իր այդ իմիջը և դրանից բխող այն բոլոր պտուղները, որոնք քաղում էր թե՛ որպես դիվիդենտներ, թե՛ որպես իմիջ», - նշել է նա:

Վերլուծաբանը որպես դրա դրսևորման օրինակ է դիտում սահմանադրական դատարանի հետ կապված հայտնի դեպքերը, երբ անօրինությունը հասավ այն աստիճանի, որ պետք էր եվրոպացիներին համոզել այդ անօրինությանը համարժեք արձագանք չտալ:

«Պարզագույն հարց՝ ինչի՞ դիմաց կարող է լինել այս առևտուրը, որը կորցնում է իր ներքո արժեքները, քանի որ նույն ՍԴ-ի և ընդհանրապես դատարանների նկատմամբ եղած գործընթացը որևէ կերպ հնարավոր չէ տեղավորել արժեքային դաշտում», - նշել է նա՝ հիշեցնելով, որ մարտին Նիկոլ Փաշինյանի հանդիպումները Եվրոպական միության մի շարք պաշտոնյաների հետ չունեին ազգային, պետական օրակարգ, դրանց խնդիրը Սահմանադրական դատարանի շուրջ այդ անօրեն գործընթացը որևէ կերպ մարսեցնելն էր:

«Այստեղից առաջանում է շատ բնական հարց: Ինչո՞վ էր պայմանավորված Լանզարոտեի կոնվենցիան այդ արագությամբ վավերացնելը, գի՞ն էր: Ստամբուլյան կոնվենցիայի հետ կապված այդ բոլոր խնդիրները գի՞ն էին» - նշել է Կարեն Բեքարյանը:

Կարեն Բեքարյանի համոզմամբ՝ այս նույն գործընթացը մենք ունենալու ենք նաև ներքաղաքական ընթացիկ զարգացումների և խորհրդարանական երկրորդ ուժի և նրա ղեկավարի նկատմամբ իրականացվող պատվերի հետ կապված. «Հիմա որ եվրոպական համայնքը չարձագանքի այս ամենին, իսկ տեսնում եք կա քար լռություն, ի՞նչ է պահանջելու դիմացը կամ ի՞նչ է արդեն պահանջել»:

Ժամանակի ընթացքում, վերլուծաբանի կարծիքով, մենք այս առևտրի մեջ դառնալու ենք ուղղակի թելադրանք կատարողի, և նման պայմաններում արդյոք կկարողանա՞նք մեր ամենակարևոր գերակայությունների, շահերի դաշտում առաջ մղել մեր դիրքորոշումներն այնպես, որ ունենանք արդյունք:

Կարեն Բեքարյանն այդ հարցի մասնակի պատասխանը տեսնում է անցած շաբաթ Եվրախորհրդարանի անդամների կողմից ընդունված հակահայկական հայտարարության մեջ:

«Եթե չի ստացվել կանխարգելել, դա, բացի սովորական պրոֆեսիոնալիզմի պրոբլմներից, կապված է նաև նրա հետ, որ անգամ այն գործընկերային չնչին կապերը, որոնք ստեղծել են, օգտագործում են Նիկոլ Փաշինյանի տարաբնույթ արժեքային իմաստով ժողովրդավարությանը, մարդու իրավունքներին հակասող քայլերը մարսեցնելու, կոծկելու համար, իրական օրակարգի համար ժամանակ և ռեսուրս չի մնում», - նշել է վերլուծաբանը:

Կարեն Բեքարյանը չի բացառել, որ Մեծամորի ատոմակայանի երկրորդ էներգաբլոկի վերազինման նպատակով ռուսական վարկից իշխանության հրաժարվելը կարող է մաս լինել գործընկերների քաղաքական առևտրի՝ հիշեցնելով, որ ԵՄ մշտապես բանակցային գործընթացում դրել է ինչ-որ պահից Մեծամորի ատոմակայանը փակելու հարցը, ինչը հայկական դիվանագիտությունը մշտապես օրակարգում հետ է մղել, քանի որ ատոմակայանը մեզ համար էական նշանակություն ունի ՝ այդ թվում անվտանգային համատեքստում:

«Իշխանությունն այսօր Հայաստանում մեծագույն մարտահրավեր է մեր պետության և հանրության համար: Մենք կարիք ունենք նոր վարչապետի, կառավարության և նոր իշխանության», - եզրափակել է նա: