Պահանջում ենք, որպեսզի Եվրամիության երկրներն արձագանքեն Հայաստանում տեղի ունեցող գործընթացներին. «ՎԵՏՕ»

Մենք այստեղ պահանջում ենք, որպեսզի Եվրամիության երկրներն արձագանքեն Հայաստանում տեղի ունեցող գործընթացներին: Այս մասին այսօր` հունիսի 14-ին, ԵՄ դեսպանատան դիմաց ասաց «ՎԵՏՕ» հասարակական-քաղաքական շարժման անդամ Անի Հովհաննիսյանը:

«Այսօր աննախադեպ բռնաճնշումներ տեղի ունեցան իշխանության կողմից, բերման ենթարկվեցին բազմաթիվ քաղաքացիներ, որոնցից շատերին նույնիսկ բացատրություն չտրվեց, թե ինչի համար տարվեցին ոստիկանության տարբեր բաժանմունքներ: Սա ճնշումներ է քաղհասարակության վերաբերյալ: Մենք այս պահին ունենք դե յուրե արտակարգ դրություն, բայց դե ֆակտո մենք ունենք իրավիճակ, երբ բացի հավաքների արգելքից որեւէ այլ բան Հայաստանում չի արվում կորոնավիրուսի կանխարգելման համար: Մենք պահանջում ենք, որպեսզի ԵՄ երկրները արձագանքեն մարդու իրավունքների կոպտագույն խախտումներին»,- ասաց նա:

Շարժման անդամ Նարեկ Սամսոնյանն էլ կոչ արեց քաղաքում ապակենտրոն ակցիաներ անել դեսպանատների դիմաց եւ բարձրաձայնել մարդու իրավունքների խախտումների հարցը։

Ակցիայի մասնակիցները նաեւ իրենց հետ պաստառներ են բերել՝ Why is EU silent,  «Դադարեցրեք քաղաքական հետապնդումները» գրառումներով:

Աղբյուր՝ NEWS.am